Rossiya tashqi ishlar vaziri Sergey Lavrov Yevropaning hozirgi rahbarlari “tarix saboqlarini unutib, Rossiyaga qarshi urush boshlashga harakat qilayotgani”ni ta’kidladi. Bu haqda Anadolu xabar berdi.
Rossiya tashqi ishlar vaziri bu haqda Kuala Lumpurdagi ASEAN tadbiri matbuot anjumanida ta’kidlagan.
“Berlin, Parij va Londonning so‘nggi bayonotlari va harakatlari shuni ko‘rsatadiki, mamlakatlarning hozirgi rahbarlari tarix saboqlarini unutgan. Ular Rossiyaga qarshi urush qo‘zg‘ash uchun harakat qilmoqda”, dedi Lavrov.
Lavrovning bu gaplari Germaniya kansleri Fridrix Mersning Ukraina haqidagi bayonotiga izoh sifatida aytilgan.
“Agar janob Mers tinchlik imkoniyatlarini yo‘q deb hisoblasa, u, ehtimol Germaniyani harbiylashtirishga butunlay o‘zini bag‘ishlashga qaror qilgan. U Rossiyadan kelayotgan ‘tahdidlar’ni qaytarish uchun natsistlar shiorlari ostida harakatlanmoqda”, dedi Lavrov.
Rossiya tashqi ishlar vaziri Moskva Yevropaning qurollanish harakatlarini “hisobga olishini” ma’lum qildi.
“Agar Yevropa yana o‘sha yo‘nalishda ketayotgan bo‘lsa, bu achinarli. Biz buni to‘liq hisobga olamiz”, deya va’da bergan u.
Sergey Lavrov Kuala Lumpurda AQSH davlat kotibi Marko Rubio bilan ham uchrashuv o‘tkazgan. Unda Rossiyaning Ukrainadagi vaziyat bo‘yicha avvalgi pozitsiyasi saqlanib qolgani ta’kidlangan.
“Biz Ukrainani muhokama qildik. Rossiya prezidenti Vladimir Putin aytgan pozitsiyani tasdiqladik. Jumladan, yana bir bor 3-iyul kuni AQSH prezidenti Donald Tramp bilan suhbatda bu haqda fikr almashilgandi”, degan vazir.
Izoh (0)