Россия ташқи ишлар вазири Сергей Лавров Европанинг ҳозирги раҳбарлари “тарих сабоқларини унутиб, Россияга қарши уруш бошлашга ҳаракат қилаётгани”ни таъкидлади. Бу ҳақда Anadolu хабар берди.
Россия ташқи ишлар вазири бу ҳақда Куала Лумпурдаги ASEAN тадбири матбуот анжуманида таъкидлаган.
“Берлин, Париж ва Лондоннинг сўнгги баёнотлари ва ҳаракатлари шуни кўрсатадики, мамлакатларнинг ҳозирги раҳбарлари тарих сабоқларини унутган. Улар Россияга қарши уруш қўзғаш учун ҳаракат қилмоқда”, деди Лавров.
Лавровнинг бу гаплари Германия канцлери Фридрих Мерснинг Украина ҳақидаги баёнотига изоҳ сифатида айтилган.
“Агар жаноб Мерс тинчлик имкониятларини йўқ деб ҳисобласа, у, эҳтимол Германияни ҳарбийлаштиришга бутунлай ўзини бағишлашга қарор қилган. У Россиядан келаётган ‘таҳдидлар’ни қайтариш учун нацистлар шиорлари остида ҳаракатланмоқда”, деди Лавров.
Россия ташқи ишлар вазири Москва Европанинг қуролланиш ҳаракатларини “ҳисобга олишини” маълум қилди.
“Агар Европа яна ўша йўналишда кетаётган бўлса, бу ачинарли. Биз буни тўлиқ ҳисобга оламиз”, дея ваъда берган у.
Сергей Лавров Куала Лумпурда АҚШ давлат котиби Марко Рубио билан ҳам учрашув ўтказган. Унда Россиянинг Украинадаги вазият бўйича аввалги позицияси сақланиб қолгани таъкидланган.
“Биз Украинани муҳокама қилдик. Россия президенти Владимир Путин айтган позицияни тасдиқладик. Жумладан, яна бир бор 3 июль куни АҚШ президенти Дональд Трамп билан суҳбатда бу ҳақда фикр алмашилганди”, деган вазир.
Изоҳ (0)