Bugun, 10-iyul kuni Kiyevning Goloseevskiy tumanida Ukraina Xavfsizlik xizmati (SBU) polkovnigi Ivan Voronich otib o‘ldirildi. Bu haqda SBU matbuot xizmatiga tayanib Ukraina nashrlari xabar berdi. Tasdiqlanmagan ma’lumotlarga ko‘ra, o‘ldirilgan polkovnik Rossiya ichida diversiya harakatlarini amalga oshirishda qatnashgan.
Ukraina huquq-tartibot organlari SBU xodimining o‘ldirilishi bo‘yicha jinoyat ishi qo‘zg‘atgan. Holat yuzasidan dastlabki tergov Ukraina Jinoyat kodeksining 348-moddasi bo‘yicha olib borilmoqda. U huquqni muhofaza qilish organi, jamoat tartibini saqlash yoki davlat chegarasini himoya qilish bo‘yicha jamoat birlashmasi a’zosi yoxud harbiy xizmatchining hayotiga suiqasdni nazarda tutadi.
Politsiya kuzatuv kamerasiga muhrlangan videoyozuvni e’lon qildi. Unda noma’lum erkak kutilmaganda paydo bo‘lib, harbiyga ovozsiz to‘pponchadan besh marotaba o‘q uzganini ko‘rish mumkin. Shundan so‘ng u olgan jarohatlari natijasida vafot etgan. Huquq-tartibot idoralari xodimlari voqea joyiga kelganda polkovnikning jonsiz tanasiga guvoh bo‘lishgan.
Qotilni izlash uchun tuman va shahar politsiya boshqarmalari tergov guruhi, jinoyat-qidiruv xodimlari, kinologlar va boshqa xizmatlar jalb etilgan.
Izoh (0)