Ukraina sobiq deputati Rossiyada o‘lik holda topildi. “SBU” uni o‘ldirishda ayblanmoqda

Ukraina Oliy Radasining sobiq deputati Ilya Kiva Moskva viloyatining Odintsovo tumanida o‘lik holda topildi. Bu haqda “RIA Novosti” xabar berdi.

Ilya Kiva 46 yoshda bo‘lgan. U 2022-yilda Ukrainani tark etgan. Joriy yilning noyabr oyi o‘rtalarida Lvovning Lichakovskiy sudi uni sirtdan 14 yilga ozodlikdan mahrum qilgan. U davlatga xiyonat qilish, nafrat uyg‘otish, hokimiyatni egallash va agressiv urushga chaqirishda ayblangan. Kiva Rossiya hududida ekani ma’lum bo‘lgan, u xalqaro qidiruvga berilgan.

“Muxolifat platformasi” partiyasiga qo‘shilishdan oldin Kiva kommunist bo‘lgan, keyin Sotsialistik partiyadan prezidentlikka nomzod bo‘lgan. 2014-2015-yillarda u Donetsk va Lugansk viloyatlaridagi harbiy amaliyotlarda qatnashgan va Donbassni majburan ukrainlashtirish haqida gapirgan.

Rossiya bosqinidan sal oldin Kiva Ukrainani tark etgan va Moskvaning harakatlarini qo'llab-quvvatlagan. Ukrainaning BBC xizmatidagi manbaning ta’kidlashicha, Kivaning o‘limi “Ukraina xavfsizlik xizmatining maxsus operatsiyasi” bo‘lib, u o‘q otish quroli bilan o‘ldirilgan. Marhumning boshida o‘qotar quroldan qolgani taxmin qilinayotgan teshik bo‘lgan.