Buyuk Britaniya G‘azo sektoridagi urush davom etsa, Isroilga qarshi choralarni kuchaytirishga tayyorligini bildirdi. Bu haqda Al Jazeera xabar berdi.
Britaniya tashqi ishlar vaziri Devid Lemmi o‘t ochishni to‘xtatish zarurligini aytdi. Unga “Agar vaziyat o‘zgarmasa, Isroilga nisbatan qo‘shimcha choralar ko‘rasizmi?” degan savol berilganda, “Ha”, deb javob qaytardi. Lemmi, shuningdek, AQSH va Isroil tomonidan qo‘llab-quvvatlanadigan G‘azo gumanitar jamg‘armasi (G‘GJ) orqali yordam tarqatishning yangi mexanizmini tanqid qildi.
Biz ushbu yordam jamg‘armasini qo‘llab-quvvatlamasligimizni aniq-ravshan aytganmiz. U yaxshi ishlamayapti. Juda ko‘p odamlar ochlikdan o‘lish arafasida. Juda ko‘p odamlar hayotdan ko‘z yumdi. Biz tashkil etilgan tizimni global qoralashda yetakchilik qildik, dedi vazir.
So‘nggi haftalarda G‘GJ yordamiga muhtoj yuzlab falastinliklar Isroil harbiylarining hujumlari oqibatida halok bo‘ldi. 27-maydan buyon yordam tarqatish punktlarida oziq-ovqat kutayotgan paytda kamida 751 falastinlik qurbon bo‘lgan, yana 4 931 nafari tan jarohati olgan.
Isroilning G‘azodagi amaliyotlari xalqaro bosimga sabab bo‘ldi
2025-yil 5-may kuni Netanyaxu kabineti G‘azo sektorida HAMASga qarshi hujumni kuchaytirish, hatto butun anklavni egallab olish va uning hududlarini saqlab qolish uchun ovoz berdi. 20-may kuni Kanada, Buyuk Britaniya va Fransiya Isroilning G‘azo sektoridagi harbiy amaliyotlarini kengaytirishni qoraladi va gumanitar yordam yetkazilishiga ruxsat berishga chaqirdi. Shu kuni Britaniya sanksiyalar kiritdi, Isroil bilan savdo muzokaralarini to‘xtatdi va G‘azo sektoridagi harbiy operatsiya va G‘arbiy Sohildagi falastinliklarga nisbatan zo‘ravonlik tufayli mamlakat elchisini chaqirtirdi.
Iyun oyida Buyuk Britaniya Avstraliya, Kanada, Yangi Zelandiya va Norvegiya falastinliklarga qarshi zo‘ravonlikni qo‘zg‘atgani uchun Isroil milliy xavfsizlik vaziri Itamar Ben-Gvir va moliya vaziri Bezalel Smotrichga sanksiyalar joriy qildi. 2-iyul kuni Isroil G‘azo sektorida 60 kunlik o‘t ochishni to‘xtatishga rozi bo‘ldi.
Izoh (0)