Eron rasmiylari aholini suv iste’molini cheklashga chaqirmoqda. Sababi jazirama tufayli mamlakatda suv tanqisligi muammosi keskinlashgan. Bu haqda Arab News xabar berdi.
Suv tanqisligi Eronda, ayniqsa mamlakat janubidagi qurg‘oqchil viloyatlarda asosiy muammo sanaladi. Milliy meteorologiya xizmati 19-iyul kuni Eronda tarixda hali qayd etilmagan jazirama bo‘layotganini, ba’zi joylarda harorat 50 darajadan oshganini ma’lum qilgan. Shu sabab mavjud muammo issiq ob-havo sharoitida yanada keskinlashgan.
“Aholi suv bosimi pasayib ketmasligi uchun uni tejashi lozim”, dedi Tehron shahar kengashi raisi Mehdi Chamran.
Mamlakat suv xo‘jaligi tashkiloti esa tanqislikni kamaytirish uchun suvdan foydalanishni “kamida 20 foizga” kamaytirishga chaqirgan.
Javan gazetasining xabar qilishicha, hukumat 19-iyul kuni tanqislikni kamaytirish maqsadida poytaxtning ba’zi qismlarida suv bosimini pasaytirgan. Natijada ba’zi hududlarda suv ta’minoti 12-18 soatgacha uzib qo‘yilgan.
Eronda suv tanqisligi iqlimning yuqori o‘zgaruvchanligi, suvning notekis taqsimlanishi, mavjud suv resurslaridan foydalanish va iqtisodiy rivojlanishga ustuvorlik berish bilan bog‘liq. 2002-yildan 2017-yilgacha butun mamlakat bo‘ylab yer osti suvlari yiliga taxminan 3,8 millimetrga kamaygan.
Izoh (0)