Bugun, 10-iyul kuni Toshkent shahri Shayxontohur tumanidagi issiq suv quvuri bosim ostida yorildi. Veolia Energy Tashkent korxonasi holat mexanik sinovlar payti yuz berganini maʼlum qildi. Oradan biroz vaqt o‘tib esa mazkur sinovlar to‘xtatilgani bildirildi.
Korxona xabariga ko‘ra, 2025-yil 30-maydan 17-iyulgacha rejalashtirilgan issiqlik tarmoqlarining gidravlik sinovlari to‘xtatildi.
“Veolia Energy Tashkent sinovlarni o‘tkazish bo‘yicha yondashuvni qayta ko‘rib chiqmoqda va truboprovodlardagi ehtimoliy avariyali uchastkalarni aniqlashning yangi, xavfsizroq usullarini ishlab chiqmoqda. Bizning maqsadimiz 2025–2026-yilgi isitish mavsumiga tayyorgarlik jarayonida aholi uchun xavflarni minimallashtirgan holda issiqlik taʼminotining ishonchliligi va xavfsizligini taʼminlash. Keyingi choralar va muddatlar haqida qo‘shimcha maʼlumot beriladi”, deyiladi manba axborotida.
Veolia korxonasi quvur 2025–2026-yillar isitish mavsumiga tayyorgarlik doirasida belgilangan jadvalga muvofiq olib borilgan mexanik mustahkamlik sinovlari vaqtida yorilganini bildirgan.
Voqea Olmazor tumanidagi Forobiy va Shifokorlar ko‘chalari kesishmasida joylashgan issiqlik tarmog‘i uchastkasida yuz bergan. Sinovlar davomida 12,6 ati bosimda diametri 800 mm bo‘lgan trubada suv chiqishi kuzatilgan. Mazkur issiqlik tarmog‘i uchastkasi 1989-yilda ekspluatatsiyaga topshirilgani qayd etilgan.
Hodisa natijasida jabrlanganlar yo‘q. Yaqin atrofdagi do‘konlarga moddiy zarar yetgan — umumiy maydoni 8 kvadrat metr bo‘lgan oyna vitrinalari singan. Yetkazilgan zarar qoplanishi maʼlum qilingan. Avariya yuz bergan uchastka tezkorlik bilan lokallashtirilib, isteʼmolchilarni issiq suv bilan taʼminlash to‘xtatilmagan.
Izoh (0)