2025-yilda O‘zbekistonda issiq suv va issiqlik taʼminoti tariflari bir martadan ortiq oshirilmaydi. Bu haqda 8-iyul kuni Toshkent shahrida o‘tkazilgan matbuot anjumanida “Issiqliktaʼminoti” AJ boshqaruv raisi Ilhom To‘rayev maʼlum qildi.
-lKU5lsAp-ct36KJhe.avif)
Ilhom To‘rayevning aytishicha, joriy yil oxirigacha tariflar ikki marta oshirilmasligi aniq.
“Chunki gaz va elektr energiyasi narxlari joyiga tushdi. Toshkent issiqlik markazi tariflari ham qayta ko‘rib chiqildi. Kengashning bitta qarori chiqadi, tariflar bir marta oshiriladi. Tariflarni oshirish oralig‘i olti oyni tashkil etadi. Agar olti oyda oshmagan bo‘lsa, keyingi yarim yil ichida ikki marta oshirilmaydi. Shuni ham inobatga olish kerakki, tariflar isitish mavsumi oldidan va mavsum yakunida qayta hisoblab chiqiladi”, dedi tashkilot rahbari.
Ilhom To‘rayev so‘zlariga ko‘ra, hozirda poytaxtda issiqlik tariflarini ko‘tarish bo‘yicha Toshkent shahar hokimligi kengashiga taklif kiritilgan. Kengash tasdiqlasa, tariflar oshiriladi.
Shu bilan birga, muloqotda issiq suv va issiqlik taʼminotini subsidiyalashdan voz kechilishi aytilgan. Ilhom To‘rayevning taʼkidlashicha, bu jarayon 2030-yilda yakunlanadi.
“Bizda aholiga pasaytirilgan narx qo‘llaniladi. Toshkent shahri va viloyatlarda turlicha narxlar belgilanadi. Yaʼni mahalliy byudjet to‘lov qobiliyatidan kelib chiqib subsidiya ajratiladi. Sohani rivojlantirish uchun issiqlik taʼminotini subsidiyalardan ozod bo‘lishimiz kerak. Lekin buni bir vaqtning o‘zida amalga oshirish qiyin. 2030-yilgacha bosqichma-bosqich subsidiyalashdan voz kechamiz. Buning uchun esa tariflarni yiliga ikki marta qayta ko‘rib chiqishimiz lozim. Albatta, narxlarni bir martada yuqoriroq oshirish ham mumkin, lekin aholiga qiyin bo‘lishi mumkin. Shuni oldini olish uchun tariflar yiliga bir yoki ikki marta qayta ko‘rib chiqiladi hamda subsidiyalar miqdori bosqichma-bosqich qisqartirib boriladi”, dedi tashkilot rasmiysi.
Avvalroq 2025-yil yanvar—iyun oylarida Toshkent shahri issiq suv va issiqlik taʼminoti uchun davlat byudjetidan 1,3 trillion so‘m ajratilgani maʼlum qilingandi.
Izoh (0)