O‘zbekistonda ichimlik va oqova suv xizmatlari bo‘yicha iste’molchilarning debitor qarzdorliklari ma’lum qilindi.
Xabar qilinishicha, ichimlik va oqova suv xizmatlari bo‘yicha iste’molchilarning debitor qarzdorliklari 794 mlrd so‘mni (aholi 577,5 mlrd so‘m, yuridik iste’molchilar 216,6 mlrd so‘m) tashkil etdi. Joriy 2025-yilining o‘tgan davri mobaynida aholini markazlashgan ichimlik suvi bilan ta’minlash borasida amalga oshirilgan ishlar natijasida aholining ta’minot darajasi 81,5 foizga yetdi.
2025-yilda respublika byudjetidan ajratilgan mablag‘lar doirasida 1-iyul holatiga 544 km ichimlik, 148 km oqova suv tarmoqlari va 35 ta ichimlik, 7 ta oqova suv inshootlarni qurildi. Aholi orasida olib borilgan targ‘ibot-tashviqot ishlari hamda tariflarni qayta ko‘rib chiqilishi natijasida suv hisoblagichlari bilan ta’minlangan iste’molchilar soni 248,9 mingtaga yoki 6 foizga oshirilib, natijada iste’molchilarning suv hisoblagichlari bilan ta’minlanganlik darajasi 82 foizga yetkazildi.
2025-yilning 1-yarim yilligida tizimlarda aniqlangan 4 935 ta nosozlik bartaraf etilib, o‘tgan yilning mos davriga nisbatan qariyb 10 foizga yoki 362 taga kamaytirilishiga erishildi.
Senat O‘zbekistonda ichimlik suvining 90 foizi qishloq xo‘jaligiga sarflanishini xabar qilgandi. Jahon banki vakili esa respublikada qariyb 7 million kishiga ichimlik suvi yetib bormasligini aytgan.
“O‘zsuvtaʼminot” AJ rais o‘rinbosari aytishicha, aholini ichimlik suvi bilan taʼminlash bo‘yicha o‘nlab loyihalar amalga oshirilmoqda.
“Biz 2030-yilgacha suv sektorini rivojlantirish bo‘yicha strategiya ishlab chiqqanmiz. Hujjatda mamlakatda ichimlik suvi bilan qamrovni 95 foizga yetkazish belgilangan. Hozirgi ko‘rsatkich 80 foiz. Yaʼni kelgusi 5 yilda suv bilan taʼminlash ko‘rsatkichini 15 foizga oshirish juda katta maqsadimiz hisoblanadi.
O‘zbekistondagi umumiy suvning 4 foizi ichimlik uchun foydalaniladi. Biz hozirda suv taʼminoti bo‘yicha jami qiymati 2 milliard dollarlik 20 ta katta investitsion loyihalarni amalga oshiryapmiz. Yana 15 ga yaqin yangi loyihalar tayyorlanyapti. Ularning qiymati ham 2 milliard dollarga yaqinlashadi. Biz 2040-yilgacha jami 4 milliard dollarlik loyihalarni amalga oshirmoqchimiz”, dedi Xurshid Rahmatullayev.
Izoh (0)