Rossiya prezidenti Vladimir Putin AQSH prezidenti Donald Trampga Moskva Ukrainadagi urushning “tub sabablarini” bartaraf etishdan voz kechmasligini aytdi. Bu haqda Al Jazeera xabar berdi.
Prezidentlar 3-iyul kuni 1 soat davomida telefon orqali suhbatlashgan. Kreml yordamchisi Yuriy Ushakov “Rossiya ortga chekinmasligini” ma’lum qilgan. Biroq u Putin “mojaroga siyosiy va muzokaralar yo‘li bilan yechim izlashga tayyorligini” bildirgan.
Tramp suhbatdan so‘ng Putin bilan o‘t ochishni to‘xtatish bo‘yicha “hech qanday oldinga siljish bo‘lmaganini” va Ukrainadagi urushdan “xursand emasligini” qo‘shimcha qilgan. Bu telefon suhbati Tramp ikkinchi prezidentlik muddatini boshlaganidan beri oltinchisi bo‘ldi. Bundan oldinroq Pentagon Kiyevga ba’zi qurol-yarog‘lar, jumladan, havo hujumidan mudofaa raketalari va aniq boshqariladigan artilleriya yetkazib berishni to‘xtatayotganini tasdiqlagandi. Bu qarorga sobiq prezident Jo Bayden ma’muriyati davrida va’da berilgandi.
Ta’kidlanishicha, suhbat davomida to‘xtatilgan qurol-yarog‘ yetkazib berish mavzusi ochilmagan. AQSH prezidenti urushni tezroq tugatish masalasiga urg‘u bergan. Yuzma-yuz uchrashuv istiqboli muhokama qilinmagan bo‘lsa-da, ikki yetakchi suhbatni davom ettirishga kelishib olgan.
Garchi Tramp Ukraina urushida vositachilik qilishga uringan bo‘lsa-da, u bu borada oz yutuqqa erishgan. Putin hozircha Vashingtonning shartsiz o‘t ochishni to‘xtatish taklifini rad etmoqda. Ukraina bu taklifni qo‘llab-quvvatlagan.
Moskva har qanday tinchlik muzokaralarida uch tomonlama formatdan qochishga harakat qilmoqda. Ukraina rasmiylarining aytishicha, rossiyalik rasmiylar iyun oyi boshida Istanbulda bo‘lib o‘tgan uchrashuvda amerikalik diplomatlardan “xonani tark etishni” so‘ragan.
Putin va Tramp oxirgi marta iyun oyi o‘rtalarida suhbatlashgan edi. O‘shanda Putin 12 kunlik Eron-Isroil urushida vositachilik qilishni taklif qilgandi. Tramp Putinning taklifiga javoban e’tiborni yana Ukrainaga qaratib, shunday degan: “Yo‘q, Eron masalasida menga yordam kerak emas. Sen bilan munosabatimizda yordam kerak”.
Ushakovning aytishicha, payshanba kungi suhbat chog‘ida Putin Eron bilan bog‘liq barcha “nizolar, kelishmovchiliklar va mojaroli vaziyatlarni” diplomatik yo‘l bilan hal qilish zarurligini ta’kidlagan.
Izoh (0)