AQSh hukumati Rossiyaning Ukrainaga bosqini yuz bergan taqdirda, qo‘shimcha cheklovlar, jumladan, Rossiyaga eksportni cheklash bo‘yicha “favqulodda” choralarni ko‘rib chiqmoqda. Bu haqda AQSh prezidenti Jo Bayden ma’muriyatining ismi oshkor etilmagan xodimiga tayanib, Reuters xabar berdi.
Bunday chora-tadbirlar sifatida telefonlar, aviatsiya va avtomobilning asosiy komponentlari hamda “ko‘plab boshqa sohalarda zarur” materiallar yetkazib berishni taqiqlash muhokama qilinmoqda, degan agentlik manbasi. Uning so‘zlariga ko‘ra, bu choralar avval ko‘rib chiqilgan cheklovlarga qo‘shimcha ravishda taklif qilingan.
Dekabr oyida CNN va Bloomberg AQSh Rossiyaga qarshi “tajovuzkor” iqtisodiy sanksiyalar paketi bo‘yicha muzokaralar olib borayotgani, potensial sanksiyalar paketi Rossiya prezidenti Vladimir Putinning atrofidagilar, rossiyalik oligarxlar, banklar va energetika kompaniyalariga qarshi choralarni o‘z ichiga olgani haqida xabar bergandi. Shuningdek, Rossiyani SWIFT banklararo mablag‘ o‘tkazish tizimidan uzib qo‘yish, rublni boshqa valyutalarga konvertatsiya qilish bo‘yicha cheklovlar versiyasi ham ko‘rib chiqilgan.
Ukraina atrofidagi vaziyat 7-dekabr kuni Rossiya va AQSh prezidentlari Vladimir Putin va Jo Bayden o‘rtasidagi onlayn muzokaralarda muhokama qilingan edi. Bayden Putinni Rossiya Ukrainaga bostirib kirgan taqdirda “keskin iqtisodiy va boshqa choralar” haqida ogohlantirgan. Putin, o‘z navbatida, NATOni “Ukraina hududini bosib olishga bo‘lgan xavfli urinishlar”da ayblagan va alyansning sharqqa tomon kengayishi to‘xtatilishiga kafolat talab qilgan.
Mavzuga doir:
- Ukraina Rossiya bosqiniga uchrasa AQSh qo‘shinlarini NATOning sharqiy qanotiga yuboradi — Bayden
- AQSh KXDR sabab Rossiyadagi OTMga nisbatan sanksiya qo‘lladi. Institutda talabalarga “inson ongiga ta’sir ko‘rsatish” va “munajjimlik menejmenti” o‘rgatiladi
- WSJ: AQSh Yevropadagi harbiy o‘quvlarini cheklashi yoki Rossiyaga qarshi sanksiyalar qo‘llashi mumkin
Izoh (0)