Pokistonda musson yomg‘irlari mavsumi boshlangan iyun oyi oxiridan buyon kuchli jala va u keltirib chiqargan hodisalar oqibatida kamida 279 kishi halok bo‘lgan va 676 kishi jarohatlangan. Bu haqda Pokiston Milliy favqulodda vaziyatlar boshqarmasi ma’lum qildi.
Ma’lum qilinishicha, 1,5 mingdan ortiq bino shikastlangan, yuzlab odamlar xavfsiz joylarga ko‘chirilgan. Chorvachilik va qishloq xo‘jaligiga jiddiy zarar yetgan.
-6xVvZwfZ.avif)
Hisobotga ko‘ra, eng ko‘p talafot sharqiy Panjob viloyatida kuzatilgan. Viloyatda 151 kishi halok bo‘lgan va 536 kishi jarohat olgan. Shimoli-g‘arbiy Xayber-Paxtunxva viloyatida 64 kishi halok bo‘lgani va 80 kishi yaralangani qayd etilgan. Shuningdek, Sind, Balujiston va Gilgit-Baltiston viloyatlaridan ham qurbonlar bor.
Mamlakat hukumati odamlar hayotini asrash va tabiiy ofat oqibatlarini yumshatishga qaratilgan chora-tadbirlarni amalga oshirmoqda. Ob-havo bashoratchilarining ma’lumotlariga ko‘ra, yaqin kunlarda kuchli yomg‘irlar 31-iyulga qadar davom etadi.
Pokistonda musson mavsumi odatda iyundan sentyabrgacha davom etib, qishloq xo‘jaligi uchun hayotiy ahamiyatga ega bo‘lgan mo‘l yog‘inlarni olib keladi, biroq ko‘pincha suv toshqinlari va boshqa tabiiy ofatlarga sabab bo‘ladi.
Bundan avval Pokistonning Panjob provinsiyasida 16-iyul kuni shiddatli musson yomg‘irlari boshlandi. Mamlakatda tabiiy ofat sabab so‘nggi 24 soat ichida 63 kishi halok bo‘lib, 290 kishi jarohatlangani ma`lum qilingandi.
Hindistonning Uttar-Pradesh shtatida momaqaldiroqli jala oqibatida kamida 45 kishi hayotdan ko‘z yumgani, poytaxt Dehlida yog‘gan kuchli jala va yirik do‘l oqibatida besh kishi halok bo‘lgani ma`lum qilingandi.
Avstraliyaning janubi-sharqida yog‘gan yomg‘ir qisqa muddatli toshqinlarni keltirib chiqargan, ko‘plab shaharlarni tashqi dunyodan uzib qo’ygan va aholi uy tomlarida jon saqlayotgani xabar qilingandi.
May oyi boshida Kongo Demokratik Respublikasida yuz bergan suv toshqinlari oqibatida esa 100 dan ortiq odam halok bo‘ldi.
Izoh (0)