Покистонда муссон ёмғирлари мавсуми бошланган июнь ойи охиридан буён кучли жала ва у келтириб чиқарган ҳодисалар оқибатида камида 279 киши ҳалок бўлган ва 676 киши жароҳатланган. Бу ҳақда Покистон Миллий фавқулодда вазиятлар бошқармаси маълум қилди.
Маълум қилинишича, 1,5 мингдан ортиқ бино шикастланган, юзлаб одамлар хавфсиз жойларга кўчирилган. Чорвачилик ва қишлоқ хўжалигига жиддий зарар етган.
-6xVvZwfZ.avif)
Ҳисоботга кўра, энг кўп талафот шарқий Панжоб вилоятида кузатилган. Вилоятда 151 киши ҳалок бўлган ва 536 киши жароҳат олган. Шимоли-ғарбий Хайбер-Пахтунхва вилоятида 64 киши ҳалок бўлгани ва 80 киши яралангани қайд этилган. Шунингдек, Синд, Балужистон ва Гилгит-Балтистон вилоятларидан ҳам қурбонлар бор.
Мамлакат ҳукумати одамлар ҳаётини асраш ва табиий офат оқибатларини юмшатишга қаратилган чора-тадбирларни амалга оширмоқда. Об-ҳаво башоратчиларининг маълумотларига кўра, яқин кунларда кучли ёмғирлар 31 июлга қадар давом этади.
Покистонда муссон мавсуми одатда июндан сентябргача давом этиб, қишлоқ хўжалиги учун ҳаётий аҳамиятга эга бўлган мўл ёғинларни олиб келади, бироқ кўпинча сув тошқинлари ва бошқа табиий офатларга сабаб бўлади.
Бундан аввал Покистоннинг Панжоб провинциясида 16 июль куни шиддатли муссон ёмғирлари бошланди. Мамлакатда табиий офат сабаб сўнгги 24 соат ичида 63 киши ҳалок бўлиб, 290 киши жароҳатлангани ма`лум қилинганди.
Ҳиндистоннинг Уттар-Прадеш штатида момақалдироқли жала оқибатида камида 45 киши ҳаётдан кўз юмгани, пойтахт Деҳлида ёғган кучли жала ва йирик дўл оқибатида беш киши ҳалок бўлгани ма`лум қилинганди.
Австралиянинг жануби-шарқида ёғган ёмғир қисқа муддатли тошқинларни келтириб чиқарган, кўплаб шаҳарларни ташқи дунёдан узиб қўйган ва аҳоли уй томларида жон сақлаётгани хабар қилинганди.
Май ойи бошида Конго Демократик Республикасида юз берган сув тошқинлари оқибатида эса 100 дан ортиқ одам ҳалок бўлди.
Изоҳ (0)