O‘zbekistonda bir necha mansabdor yer ajratib berish va hujjat ishlarini bitirish evaziga pora olgan paytda qo‘lga tushdi. Bu haqda Davlat xavfsizlik xizmati xabar berdi.
Maʼlum qilinishicha, Andijon tuman hokimining sobiq o‘rinbosari, shahar statistika bo‘limi boshlig‘i va yana ikki shaxs tadbirkordan 150 ming dollar pora olgan paytda ushlangan. Ular tadbirkorga “Ipak yo‘li” erkin iqtisodiy zonasidagi 6 gektar yerni auksion orqali olib berish uchun jami 600 ming dollar talab qilgan. Ishga hozirda xususiy bandlik agentligida ishlayotgan, Raqobat qo‘mitasi sobiq masʼuli ham aloqador bo‘lgan. U 11 ming dollar pora olgani aniqlangan.
Yana bir poraxo‘rlik ishi Andijon viloyati Xonobod shahar hokimi o‘rinbosari va avval sudlangan xususiy korxona rahbari ishtirokida sodir etilgan. Ular o‘zaro til biriktirib, 4 gektar yerni auksion orqali rasmiylashtirib berish evaziga tadbirkordan 20 ming dollar olgan vaqtda ushlangan.
Toshkent viloyati Ohangaron tumanida esa pensiya jamg‘armasi bo‘lim boshlig‘i fuqaroni yo‘qolgan mehnat daftarchasini tiklab, uni yoshga doir pensiyaga chiqarib berish evaziga 1500 dollar pora olgan vaqtida qo‘lga tushgan. U oldin ham jinoyat ishlari bo‘yicha sudlangani qayd etilgan.
Hozirda yuqoridagi holatlar yuzasidan jinoyat ishlari qo‘zg‘atilib, barcha ishtirokchilarga nisbatan qamoq ehtiyot chorasi qo‘llanilgan. Tergov harakatlari ketmoqda.
Joriy yil 9-iyul kuni Sharof Rashidov tumani hokimi va Guliston shahar prokurori o‘rinbosari pora olayotganda ushlangani xabar qilingandi. 12-iyulda esa Toshkent va Farg‘onada universitetlar kafedra o‘qituvchilari pora bilan qo‘lga olingan. Mazkur hodisaga Oliy ta’lim, fan va innovatsiyalar vaziri Qo‘ng‘irotboy Sharipov munosabat bildirib, bu mutlaqo kechirilmas va keskin qoralovga loyiq harakatlar ekanini, bunday noqonuniy urinishlar butun oliy ta’lim tizimiga dog‘ tushirishini aytgan.
Izoh (0)