O‘tgan yili vazirlik tizimida mansabni suiisteʼmol qilish, pora oldi-berdisi va davlat mablag‘larini talon-toroj qilish bilan bog‘liq jinoyatlar ulushi ko‘p bo‘lgan. Bu haqda Senat xabar berdi.
Maʼlum qilinishicha, 2024-yil davomida Sog‘liqni saqlash vazirligi tizimida 500 dan ortiq korrupsiyaga oid jinoyatlar qayd etilgan. Ularning katta qismi mansabni suiisteʼmol qilinish, pora olish-berish va davlat mablag‘larini talon-toroj qilish bilan bog‘liq. Shu bilan birga, davlat xaridlari sohasida ham qator qonun buzilishlari holatlari aniqlangan.
Xabarga ko‘ra, tibbiyot muassasalarida raqamlashtirish jarayonlari sust ketmoqda, kadrlar tanqisligi, ishga qabul qilishda shaffoflik yo‘q va tibbiy xizmatlar sifati turlicha.
“Korrupsiyaga qarshi kurashish faqat jazo choralari bilan cheklanib qolmasligi kerak. Asosiy maqsad – tizimda sezilarli o‘zgarishlarga erishish, fuqarolarning sog‘liqni saqlash tizimiga ishonchini mustahkamlashdir. Buning uchun birinchi navbatda, ichki nazorat, ochiqlik va hisobdorlikni taʼminlash lozim”, deya fikr bildirgan Senat raisi Tanzila Norboyeva.
O‘zbekiston 2024-yilda korrupsiyani qabul qilish xalqaro indeksida 180 ta davlat orasida 121-o‘rinni egallagan. Umumiy 100 ballik baholashdan bor–yo‘g‘i 32 ball to‘plagan. Umuman olganda, 50 balldan past natija davlatda korrupsiya yuqori darajada ekanini anglatadi.
Tadqiqotlarga ko‘ra, mamlakatda jamoatchilik ko‘pincha korrupsiyani poraxo‘rlik va qarindosh-urug‘chilik deb tushunadi. 50 foizdan ortiq respondent korrupsiya — bu mansabni suiisteʼmol qilish va qarindosh-urug‘chilik, 40 foizdan kamrog‘i uchun esa qimmatbaho sovg‘alar berish deb tushunishini bildirgan.
Izoh (0)