“Liverpul” futbolchisi Luis Dias “Barselona” safiga qo‘shilishni xohlamoqda. Kolumbiyalik futbolchi Kataloniya klubi bilan shartnoma imzolashga tayyor. AS nashrining xabar berishicha, Dias “Atletik” hujumchisi Niko Uilyamsdan farqli o‘laroq, agar “Barselona” uni ro‘yxatdan o‘tkaza olmasa ham, shartnomani bir tomonlama bekor qilish huquqini talab qilmayapti.
Biroq futbolchi shartnomaga bir muhim band kiritilishini istamoqda: agar klub uni 31-avgustga qadar La Liga ro‘yxatidan o‘tkaza olmasa, “Barselona” unga moliyaviy kompensatsiya to‘lash majburiyatini oladi. Aynan shu talab klub rahbariyati uchun asosiy to‘siqlardan biriga aylanmoqda.
Avvalroq “Bavariya” ham Diasning transferi borasida “Liverpul” bilan muzokara boshlagani xabar qilingandi.
28 yoshli Dias “Liverpul” tarkibiga 2022-yil yanvar oyida qo‘shilgan. Uning joriy shartnomasi 2027-yil yozigacha amal qiladi. Transfermarkt ma’lumotlariga ko‘ra, futbolchining bozor qiymati 70 million yevroga teng.
Eslatib o‘tamiz, “Barselona” moliyaviy cheklovlar sababli yaqinda bir nechta transferlarni La Liga ro‘yxatidan o‘tkaza olmagan. Klub hozircha moliyaviy feyr-pley talablarini to‘liq bajara olmayapti. Shu bois Dias transferining amalga oshishida muammolar yuzaga kelmoqda.
Izoh (0)