“Barselona” yozgi transfer oynasida hujumni kuchaytirishni rejalashtirmoqda. Shu bois jamoaga Viktor Osimhen va Dushan Vlahovich nomzodlarini taklif qilishgan. Ammo klub arzonroqqa yoki shartnomasi yakuniga yetib, erkin agent maqomida bo‘lgan hujumchilar bilan shartnoma imzolamoqchi. Bu haqida Sport.es nashri xabar bermoqda.
Robert Levandovski keyingi mavsumda ham klubda qoladigan bo‘lsa-da, “Barselona” yangi hujumchi yoki qanot vingeri sotib olish haqida o‘ylamoqda. So‘nggi haftalarda klubga bir necha futbolchilar, jumladan Dushan Vlahovich va Viktor Osimhen nomzodlari taklif qilingan.
“Barselona” Vlahovichning transferiga qiziqish bildirmadi, sababi serbiyalik futbolchining transfer qiymati 70 million yevroni tashkil qiladi. Shuningdek, hozirda “Galatasaroy”da ijarada o‘ynayotgan Osimhenning ham narxi taxminan 70 million yevro bo‘lib, bu summa “Barselona” uchun juda yuqori narx hisoblanadi. Shuning uchun klub boshqa variantlarni ko‘rib chiqishga davom etadi.
Avvalroq “Barselona” bosh murabbiyi Hansi-Diter Flik “Liverpul” futbolchisi Luis Dias transferidan ham voz kechgani xabar qilingan edi.
Maʼlumot uchun, “Barselona” 29 uchrashuvdan keyin La Liga turnir jadvalida 66 ochko bilan yetakchilik qilmoqda. Ularning asosiy taʼqibchisi “Real” 63 ochko bilan 2-o‘rinda bormoqda.
Izoh (0)