AQShning “Inter Mayami” klubi argentinalik hujumchi Lionel Messi bilan amaldagi shartnomani uzaytirishni rejalashtirmoqda. Bu haqda taniqli insayder Fabritsio Romano xabar berdi.
Manbaga ko‘ra, har ikki tomon — ham futbolchi, ham klub hamkorlikni davom ettirishdan manfaatdor:
“Lionel Messining shartnomasi 2025-yil oxirigacha amal qiladi. Hozirda tomonlarning har ikkisi ham hamkorlikni davom ettirishdan manfaatdor”, — deydi Romano.
Avvalroq hujumchi Saudiya Arabistoni klublarining biri bilan muzokara olib borayotgani borasida xabarlar tarqalgan edi.
Ma’lumot uchun, 38 yoshli Messi “Inter Mayami” safiga 2023-yilda qo‘shilgan. U joriy mavsumda klub safida 24 ta o‘yinda maydonga tushib, 16 ta gol va 6 ta golli uzatmaga mualliflik qilgan. Transfermarkt portali uning qiymatini 18 million yevroga baholamoqda.
Eslatib o‘tamiz, Messi professional faoliyatining katta qismini “Barselona”da o‘tkazgan. U Kataloniya klubi safida 17 yildan ortiq to‘p surgan bo‘lib, 2021-yilda Parijning “PSJ” klubiga o‘tgan edi. U yerdagi ikki yillik faoliyatidan keyin “Inter Mayami” bilan shartnoma imzolagan.
Izoh (0)