O‘zbekistonda joriy yil 1-avgustdan chiqindi xizmatlaridan qarzdorlar uchun elektr to‘loviga cheklov kuchga kiradi. Bu tartib chiqindilar uchun to‘lov intizomini kuchaytirishga doir qonunda belgilangan.
Qonunga asosan, har oyning 3-sanasigacha chiqindi xizmatidan qarzdorlar to‘g‘risidagi maʼlumotlar “Hududiy elektr tarmoqlari” AJ billing tizimiga uzatiladi. So‘ngra qarzdor iste’molchilarga har oyning 5-sanasigacha xabarnoma yuboriladi. Ogohlantirish yuborilganidan so‘ng, qarzdorlikni bartaraf etishga besh kun muddat beriladi.
Mavjud qarzdorlik ushbu muddat ichida to‘lanishi lozim. Aks holda elektr energiyasi uchun to‘lov qilish imkoniyati vaqtinchalik cheklanadi. Qarzdorlik bartaraf etilishi bilan cheklov avtomatik olib tashlanadi.
Mazkur tartib 2025-yil 1-iyuldan keyingi chiqindi xizmatlaridan shakllangan qarzdorliklar uchun joriy etiladi.
Hukumat portalida yozilishicha, sanitar tozalash korxonalari chiqindi to‘lovlarini hisoblashda aniqlik va haqqoniylik uchun javobgar. Isteʼmolchilarga o‘z vaqtida va sifatli xizmat ko‘rsatilmagan kunlardagi to‘lovlar qayta hisob-kitob qilinadi.
Izoh (0)