AQSH Kongressi Senati USAID va NPR hamda PBS jamoat teleradiokompaniyalarini moliyalashtirish uchun ajratilgan jami 9 milliard dollarlik davlat xarajatlarini bekor qilish to‘g‘risidagi qonun loyihasini ma’qulladi. Bu haqda CNN telekanali xabar bermoqda.
Ta`kidlanishicha, xarajatlar 2025-yilgi Amerika byudjetiga kiritilgani bois, ularni bekor qilish uchun Oq uy Vakillar palatasi va Senatning roziligini olishi zarur edi.
Qonunga ko‘ra, endi AQSH Xalqaro taraqqiyot agentligi (USAID) faoliyati uchun Davlat departamentiga ajratilgan 7,9 milliard dollar hamda Amerika jamoat teleradiokompaniyasiga yo‘naltirilgan 1,1 milliard dollar federal byudjetga qaytariladi. Bu summa NPR va PBS davlat tomonidan moliyalashtiriluvchi korporatsiyaning ikki yillik byudjetiga deyarli to‘liq mos keladi.
4-iyun kuni AQSH prezidenti Donald Tramp Kongressga xorijiy yordam va NPR hamda PBS’ni moliyalashtirish uchun ajratilgan davlat xarajatlarini bekor qilish to‘g‘risidagi so‘rovnomani yubordi. NPR AQSHning 797 ta radiostansiyasini, PBS esa 50 shtatdagi 354 ta tijorat bo‘lmagan telestansiyani o‘z ichiga oladi.
“Bu moliyaviy ehtiyotkorlik sari qo‘yilgan kichik, ammo muhim qadam va barchamiz uning allaqachon zaruriyat kasb etganini tan olishimiz lozim”, deydi Senator Jon Tun.
AQSH Xalqaro taraqqiyot agentligining faoliyati (USAID) 1-iyul kuni rasman tugatildi. Prezident Donald Tramp o‘zining ikkinchi prezidentlik davrida agentlikni isrofgarchilikka yo‘l qo‘yganlikda ayblab, uni asta-sekin tugatayotgan edi.
USAID haqida
Tashkilot 1961-yilda AQSH prezidenti Jon Kennedining xorijiy mamlakatlarga yordam ko‘rsatish to‘g‘risidagi qonuni qabul qilinganidan so‘ng ijro farmoni bilan tashkil etilgan. Agentlik AQSHning xalqaro rivojlanish masalalari bilan shug‘ullangan bir nechta avvalgi idoralarining vazifalarini o‘zida mujassamlashtirdi. USAID 1998-yildan beri mustaqil agentlik maqomiga ega.
USAID’ning umumiy siyosiy rahbarligini AQSH davlat kotibi amalga oshiradi, shuningdek, agentlik prezident va Milliy xavfsizlik kengashiga bo‘ysunadi. Direktor va uning ikki o‘rinbosarini AQSH prezidenti kongress roziligini olib tayinlaydi.
Tashkilotning byudjeti 50 milliard dollardan oshgan. Bugungi kunda uning tarkibida 10 mingdan ortiq xodim ishlaydi, ularning uchdan ikki qismi Qo‘shma Shtatlardan tashqarida faoliyat yuritadi. Tashkilot tarkibiga bir nechta mintaqaviy va ixtisoslashgan byurolar kiradi.
Izoh (0)