Tojikiston O‘zbekiston hukumati bilan elektr energetikasi sohasidagi hamkorlikning asosiy tamoyillari to‘g‘risidagi Bitim loyihasini ma’qulladi. Hujjat Rog‘un gidroelektr stansiyasida ishlab chiqarilgan elektr energiyasini qo‘shni O‘zbekistonga yetkazib berishni nazarda tutadi. Bu haqda Tojikiston Adliya vazirligi huquqiy axborot portalida xabar berildi.
Loyihaga ko‘ra, yetkazib berish hajmi va shartlari “Rog‘un GES” OAJ va “O‘zenergoinspeksiya” AJ o‘rtasida alohida shartnoma bilan belgilanadi. Elektr energiyasi uchun belgilangan narx 1 kVt/soat uchun 3,4 AQSH sentini tashkil etadi (nol darajali stavka bo‘yicha QQS hisobga olingan holda). Narx har yili 1 foizga indeksatsiya qilinadi, bu jarayon ikkinchi yildan boshlanadi.
Elektr energiyasi ikki davlatning elektr tizimi operatorlari kelishgan jadval asosida, asosan O‘zbekistonda elektr tanqisligi kuzatiladigan soatlarda yetkazib beriladi. Rog‘un GES qurilishi tugamaguncha, energiya faqat vegetatsion davrda (1 aprel — 30 sentyabr) yetkazib beriladi. GES to‘liq ishga tushganidan keyin esa elektr energiyasi yil davomida har oyda jo‘natiladi.
Rog‘un energiyasini yetkazib berish “Barki Tochik” OAJ tomonidan yetkazib berilayotgan amaldagi hajmlar bilan parallel ravishda amalga oshiriladi. Bitim yuzaga kelishi mumkin bo‘lgan kelishmovchiliklarni maslahatlashuvlar va muzokaralar yo‘li bilan hal etadi.
Shuningdek, tomonlarning o‘zaro roziligi bilan o‘zgartirishlar kiritish imkoniyatini nazarda tutadi. Hujjat 20 yilga mo‘ljallangan bo‘lib, agar tomonlar uni bekor qilish istagini muddati tugashidan 6 oy oldin bildirmasa, u avtomatik tarzda yana 10 yilga uzaytiriladi.
Izoh (0)