Toshkentda fuqaroga haydovchilik guvohnomasi olib berish uchun pul olgan PPX inspektori qamoqqa olindi.
DXX matbuot xizmatining ma’lum qilishicha, Toshkent shahar IIBB Jamoat tartibini saqlash boshqarmasining Patrul-post xizmati inspektori xizmat mavqeini suiiste’mol qilgan holda o‘zganing ishonchiga kirib, uning Navoiy viloyatida yashovchi, 1995-yilda tug‘ilgan tanishini davlat imtihonidan muvaffaqiyatli o‘tkazib, unga haydovchilik guvohnomasini olib berishini aytgan.
DXX Toshkent shahar bo‘yicha boshqarmasi va Bosh prokuratura huzuridagi Departament xodimlari hamkorligida Yunusobod tumanida o‘tkazilgan tezkor tadbirda inspektor 1 500 AQSH dollari va kirish imtihoni uchun to‘lanishi lozim bo‘lgan 1 million 900 ming so‘m pulni olgan vaqtida ashyoviy dalillar bilan ushlangan.
Holat yuzasidan unga nisbatan Jinoyat kodeksining 168 (firibgarlik) va 211-moddalari (pora berish) bilan jinoyat ishi qo‘zg‘atilib, qamoq ehtiyot chorasi qo‘llanildi. Hozirda tergov harakatlari olib borilmoqda.
Qonunchilikka ko‘ra, firibgarlik jinoyati uchun BHMning 50 baravaridan 100 baravarigacha miqdorda jarima yoki 2 yilgacha axloq tuzatish ishlari yoki 1 yildan 3 yilgacha ozodlikni cheklash yoxud uch yilgacha ozodlikdan mahrum qilish jazosi beriladi. Pora berish esa BHMning 50 baravaridan 100 baravarigacha miqdorda jarima yoki 2 yildan 5 yilgacha ozodlikni cheklash yoxud 5 yilgacha ozodlikdan mahrum qilish bilan jazolanadi.
Bundan avval Toshkentda fuqaroga berilgan qamoq ehtiyot chorasini garov ehtiyot chorasiga o‘zgartirib berishni va’da qilib, ayblanuvchining qarindoshidan 18 ming dollar olgan Mirobod tumani ichki ishlar organlari faoliyatini muvofiqlashtirish boshqarmasi bo‘linma boshlig‘i qamoqqa olingandi.
Izoh (0)