Avstriyaning Grats shahridagi maktabda yuz bergan otishmada kamida 11 kishi halok bo‘ldi, 30 ga yaqin kishi jarohat oldi. Jabrlanganlarning ba’zilari og‘ir ahvolda. Bu haqda AUF1 telekanali xabar qilmoqda.
10-iyun kuni ijtimoiy tarmoqlarda Grats shahridagi gimnaziyada sodir bo‘lgan otishma videosi tarqaldi. Taxminlarga ko‘ra, videoyozuv voqea paytida maktab binolaridan birida yashiringan o‘quvchi tomonidan olingan.
Mahalliy ommaviy axborot vositalarining xabar berishicha, taxminan ertalab soat 10 larda Dreyershyuttsengasse ko‘chasidagi federal oliy maktab-gimnaziyasida o‘q ovozlari eshitilgan. Guvohlarning aytishicha, o‘q ovozlari o‘ttizga yaqin bo‘lgan. O‘q otgan shaxs xuddi shu maktabning o‘quvchisi bo‘lib, uning ismi hozircha oshkor qilinmagan. Otishma ikki sinfda kutilmaganda sodir bo‘lgani uchun qurbonlar soni ko‘p bo‘lgan.
So‘nggi ma’lumotlarga ko‘ra, 11 kishi halok bo‘lgan, og‘ir yaralanganlar soni o‘n nafar kishidan oshgan. Ularning ayrimlari og‘ir ahvolda kasalxonalarga yetkazilgan.
Jinoyatning sababi sifatida o‘smirning sinfdoshlari tomonidan qilingan tahqirlashlar uchun qasos olish ko‘rsatilmoqda. Barcha o‘qlarni otib bo‘lgach, u o‘zini o‘ldirgan — uning jasadi hojatxonalardan birida topilgan. Maktab binosi qurshovga olingan, unda politsiya va “Kobra” maxsus bo‘linmasi xodimlari faoliyat yuritmoqda. Huquq-tartibot idoralari jinoyatchining sherigi bo‘lishi mumkinligini istisno etishmayapti.
Ma’lum bo‘lishicha, hujum qilgan shaxs 22 yoshli sobiq maktab-gimnaziya o‘quvchisi bo‘lgan. U qonuniy asosda qurol — to‘pponcha va sochma miltiq egasi edi. Jinoyatchi asosan o‘quvchilarning boshiga yaqin masofadan o‘q uzgan, halok bo‘lganlar va og‘ir yaradorlarning ko‘pligi ham shu bilan bog‘liq. U ikkita sinfda o‘t ochgan, ulardan biri uning sobiq sinfi edi.
Hozirgacha rasmiylar o‘n kishining vafot etganini tasdiqladi: sakkiz nafar maktab o‘quvchisi va bir nafar katta yoshli kishi, shuningdek, hujumchining o‘zi.
Ta’kidlanishicha, Grats kasalxonalariga atrofdagi aholi punktlaridan tibbiy brigadalar jalb qilingan. Otishma natijasida olib kelingan jarohatlanganlar soni yigirma kishidan oshadi. Ulardan kamida to‘rt nafari og‘ir ahvolda.
Izoh (0)