Xitoylik 92 yoshli ayol salomatligini saqlash uchun har kuni 200 marta “otjimaniya” qiladi va 100 marta o‘tirib-turadi. Bu haqda South China Morning Post gazetasi xabar bermoqda.
Ma’lum qilinishicha, Xitoyning markaziy Xunan viloyatida 92 yoshli Li familiyali ayol istiqomat qiladi. U mashg‘ulotlari haqidagi lavha televideniyeda ko‘rsatilgandan so‘ng mashhurlikka erishgan. Buvi har kuni 200 marta qo‘lni bukib yoyish (“otjimaniya”) va 100 marta o‘tirib-turish mashqlarini bajaradi.
“Muxbirlar Lining uyiga kelganida, u ularning iltimosini bajonidil bajardi, karavotda 100 marta o‘tirib-turib, polda 200 marta qo‘lini bukib yoydi”, deb yozadi gazeta.
Ta’kidlanishicha, ayol “chambarakni mohirona aylantiradi”. Lining aytishicha, uning sog‘lig‘i “chindan ham mashqlar tufayli yaxshilangan”.
“Ehtimol, mening qo‘l tortishdagi harakatlarim standartlarga to‘g‘ri kelmasligi mumkin, lekin men har kuni 200 marta bu mashqni bajarishni davom ettiraman”, deydi ayol.
Xitoyda keksalar uchun sport bilan shug‘ullanish odatiy hol hisoblanadi. Xitoy shaharlari ko‘chalarida katta yoshdagi erkak va ayollar taytszi sog‘lomlashtirish gimnastikasi bilan shug‘ullanadilar, kechqurunlari ko‘cha raqslarida ishtirok etadilar, shuningdek, sport maydonchalaridagi jamoat trenajyorlaridan faol foydalanadi.
Izoh (0)