Braziliyada ikki yoshli bola otasining qurolini o‘ynab, tasodifan onasiga o‘q uzdi. Hodisa oqibatida 27 yoshli Debora Rodriges vafot etdi. Bu haqda Daily Mail xabar berdi.
Voqea Rio-Verdi-di-Matu-Grosu munitsipalitetida yuz bergan. O‘q ovozidan so‘ng ayol, ehtimol, shok holatida, o‘rnidan turib tanasidagi jarohatlarni ko‘zdan kechirgan. U bir necha qadam yurib, yiqilgan. Uning turmush o‘rtog‘i birinchi yordam ko‘rsatishga uringan. Ayol shifoxonaga olib ketilgan, biroq shifokorlar uning hayotini saqlab qola olmagan.
Ma’lumotlarga ko‘ra, bola stol ustida yotgan 9 millimetrli Glock to‘pponchasini olgan. Er-xotin suhbatga berilib ketgani bois qurol qanday qilib bolaning qo‘liga tushib qolganini sezmagan. Ayol bolaga qaraganida o‘q uzilgan.
Marhumaning eri fermer bo‘lib, qurol saqlash uchun ruxsatnomaga ega bo‘lgan. Politsiya xodimlari erkakka ehtiyotsizlik oqibatida odam o‘ldirish moddasi bo‘yicha ayblov qo‘yishi kutilmoqda. Tergov davomida u ozodlikda qoladi. Ayni paytda unga farzandiga qarashga ruxsat beriladimi yoki bola ijtimoiy xizmatlar vasiyligiga topshiriladimi — bu hali noma’lum.
Izoh (0)