Pop musiqa qiroli Maykl Jeksonning sobiq advokati Brayan Oksmanning so‘zlariga ko‘ra, afsonaviy qo‘shiqchining vafotiga sud jarayonlari sabab bo‘lgan.
Tergov ishlari uzoq davom etgan va xonandaning ruhiyatiga og‘ir ta’sir qilgan, oqibatda Jeksonning ruhiy holati izdan chiqqan. Bu haqda advokat Radar Online nashriga bergan intervyusida aytib o‘tdi.
Maykl kechalari har zamon qo‘ng‘iroq qilaverar edi. U doim bitta savolni berardi: “Nega? Axir men ularga yaxshilik qilgan edim-ku! Nega endi ular menga qarshi yolg‘on to‘qishyapti?” U bunday fitnani ko‘ngliga sig‘dira olmasdi. Bunday savollar unga so‘nggi yillarda hech tinchlik bermadi va o‘limigacha ta’qib qilib keldi, dedi Oksman.
Maykl Jekson hayotining so‘nggi yillarida bolalarga nisbatan jinsiy zo‘ravonlikda ayblangan va bir necha marta sud qilinib, yakunda oqlangan edi. Biroq jamiyatdagi bosim, ijtimoiy tarmoq va ommaviy axborot vositalaridagi cheksiz taxminlar, shuningdek, so‘rovlar natijasida amerikaliklarning katta qismi — taxminan 80 foizi uni aybdor deb hisoblashi Jekson uchun ruhiy zarba bo‘lgan:
Men san’atkorman, men doim odamlar muhabbatiga muhtojman. Ammo ularning 80 foizi meni jinoyatchi deb bilsa, endi qanday yashayman, degan edi Jekson advokatiga.
Ma’lumki, Maykl Jekson 2009-yil 25-iyun kuni Los Anjelesdagi uyida vafot etgan. Tibbiy ekspertiza uning o‘limiga og‘riq qoldiruvchi kuchli dori — propofol va boshqa preparatlarning birgalikdagi nojo‘ya ta’siri sabab bo‘lganini aniqlagan. O‘sha kuni ertalab uning shifokori Konrad Myurrey Jeksonga propofol inyeksiyasini qilgan va xonandani yolg‘iz qoldirgan. 2011-yil noyabrida Myurrey ehtiyotsizlik tufayli qasddan bo‘lmagan qotillikda aybdor deb topilib, 4 yilga ozodlikdan mahrum etilgan. U 2013-yilda muddatidan oldin qamoqdan chiqarilgan.
Maykl Jekson (1958–2009) amerikalik qo‘shiqchi, raqqos, bastakor va prodyuser, zamonaviy pop musiqasining eng yirik namoyondalaridan biri. U 5 yoshidan ekranlarga chiqa boshlagan va The Jackson 5 guruhi tarkibida tanilgan. 1980-yillardan boshlab yakkaxon faoliyatida ulkan muvaffaqiyatlarga erishgan.
Uning Thriller albomi musiqa tarixidagi eng ko‘p sotilgan albom hisoblanadi. Billie Jean, Beat It, Bad, Smooth Criminal, Black or White kabi hitlari musiqiy sanoatda inqilob yasagan. Sahnadagi o‘ziga xos uslubi, xususan, “Oy yurishi” raqsi butun dunyoga mashhur bo‘lgan Jekson 13 marta “Gremmi” mukofoti sohibi bo‘lgan. Uni hanuz “Pop qiroli” deb atab kelishadi.
Izoh (0)