Sancho, Lautaro, Kulibali va Balotelli. Yoz va kuzning amalga oshmagan eng shov-shuvli transferlari

Yevropaning aksariyat ligalarida yozgi transferlar oynasi allaqachon yopilib bo‘ldi. To‘g‘ri, koronavirus pandemiyasi tufayli u odatdagidan uzoqroq davom etdi. Ammo shuncha vaqt ham klublar uchun barcha muammoli pozitsiyalarni yopish uchun yetarli bo‘lmadi. Bundan tashqari, xuddi shu pandemiya sababli yuzaga kelgan iqtisodiy inqiroz potensial xaridorlarning imkoniyatlariga sezilarli darajada ta’sir ko‘rsatdi.

Klublarning u yoki bu futbolchini sotib ololmaganiga ko‘p sabablar bor. Ammo ba’zi amalga oshishi mumkin bo‘lgan bitimlar haqiqatda boshqalaridan ajralib turardi. Ular haqida ko‘p gapirildi: insayderlar har kuni o‘z obunachilarini yangi ma’lumotlar bilan “boqib” turdi, muxlislar esa o‘z jamoalariga keladigan yangi o‘yinchilarning yutuq va kamchiliklarini muhokama qildi. Biroq yakunda uzoq kutilgan transferlarning aksariyati gapligicha qolib ketdi. Demak, quyida yozning (+kuz) amalga oshmagan eng shov-shuvli transferlari haqida fikr yuritiladi.

Jeydon Sancho “Borussiya Dortmund”

Da’vogar: “Manchester Yunayted”

Sancho ushbu ro‘yxatda haqli ravishda birinchi bo‘lishi kerak. Boisi uning “Manchester Yunayted”ga o‘tishi ehtimoli butun yoz davomida muhokama qilindi. Ammo inglizning vataniga qaytishi ro‘y bermadi. “Qizil iblislar” bir necha oy davomida “arilar” bilan muzokara olib borgan bo‘lishiga qaramay, “Borussiya” 20 yoshli vingerini 120 million yevrodan kamiga qo‘yib yubormayman deb turib oldi. Manchesterliklar esa Sancho uchun maksimum 80 million to‘lashga tayyor ekanini aytdi. Shu tariqa kelishuv barbod bo‘ldi, ammo mankunianliklar taslim bo‘lishni istamayapti, ular yanvar oyida yana Sancho transferi borasidagi ishni tiklash niyatida.

Memfis Depay “Lion”

Da’vogar: “Barselona”

Ronald Kuman katalon klubini qabul qilib olganidan ko‘p o‘tmay, “Barselona” Depay bilan aloqalarni boshladi. Memfisning “Lion”dan ketishi haqida juda ko‘p gaplar bo‘ldi. Hatto uning o‘zi ham ochiqchasiga jon deb Kataloniyaga yo‘l olmoqchiligini aytdi. Ammo u vaziyat qurboniga aylandi: “ko‘k-anorranglilar” g‘aznasida niderlandiyalik uchun shunchaki pul yo‘q edi. Transfer oynasining so‘nggi kunlarida “Lion” hatto “Barselona”ga yon bosib, uni arzonroq berishga ham rozilik bildirdi. Biroq Bartomeu boshchiligidagi rahbariyat Kumanning talabini qondira olmadi. Hozirda klublarning qishda yana muzokaralarni boshlashi kutilmoqda. Depayning “Lion” bilan shartnomasi yakunlanishiga esa 1 yil qoldi va u bu kelishuvni uzaytirish niyatida emas.

Ussyem Auar “Lion”

Da’vogar: “Arsenal”

Bir necha kun oldin Fransiyani tark etishi mumkin bo‘lgan “Lion”ning yana bir futbolchisi Auar edi. “Arsenal” Liga 1 vakillari bilan uzoq vaqt muzokara olib bordi, ammo tomonlar so‘nggi pallagacha narx borasida kelisha olmadi. Fransuzlar 22 yoshli yarim himoyachi uchun eng kamida 50 million yevro talab qilgan bo‘lsa, “kanonirlar” 40 milliondan ko‘p bermasligini aytdi. Bu vaziyatda “Lion” yon berishni xohlamadi va bunga to‘la haqli edi. Depaydan farqli o‘laroq Auarning klub bilan shartnomasi yana 3 yil davomida amalda bo‘ladi. Bundan tashqari, Ussem fransuz klubi tarbiyalanuvchisi hisoblanadi, “to‘quvchilar” esa har doim o‘z futbolchilarini qadrlab kelgan. Dastavval futbolchining “Arsenal” bilan shaxsiy shartnoma borasida kelishib olgani aytildi, biroq yakunda aynan uning o‘zi “Lion”da qolishini ma’lum qildi.

Erik Garsiya “Manchester Siti”

Da’vogar: “Barselona”

Yozda “Barselona” yangi markaziy himoyachi izlay boshladi va 19 yoshli Garsiya variantida to‘xtalishga qaror qildi. Ispaniyalik futbolchi “Barselona” akademiyasi tarbiyalanuvchisi hisoblanadi, ammo hozirda “Manchester Siti” sharafini himoya qilmoqda. Kataloniyaliklar futbolchi uchun bonuslar bilan birga 18 million yevro taklif qildi. “Shaharliklar” esa “bor-yo‘g‘i” yana 2 million qo‘shishni talab qildi. “Barselona”ga mana ushbu 2 million shu darajada ko‘plik qildiki, deyarli hal bo‘lgan transferni ham amalga oshira olmadi. Garsiyaning amaldagi shartnomasi kelasi mavsumga borib o‘z nihoyasiga yetadi. Agar “Siti” Garsiyani tekinga qo‘yib yuborishni istamasa, qishda boshqacharoq yo‘l tutishi kerak bo‘ladi.

Lautaro Martines “Inter”

Da’vogar: “Barselona”

“Barselona” bir yildan oshiq vaqt davomida “Inter” hujumchisi Lautaro Martinesni o‘z tarkibiga jalb qilishga urindi. Biroq “neradzurri” futbolchini faqat 111 million yevrogagina qo‘yib yuborishini ma’lum qildi. Avvaliga “Barselona” futbolchi uchun ushbu mablag‘ni to‘lashni xohlamadi, keyinchalik esa (pandemiyadan keyin) to‘lashga qurbi yetmay qoldi. Ma’lum bo‘lishicha, “ko‘k-anorranglilar” milanliklarga o‘z futbolchilari qo‘shilgan bir nechta shartnoma taklif qilgan, biroq “qaynoq” italyanlarni ularning hech biri qiziqtirmadi. Asta-sekin kataloniyaliklarning argentinalik futbolchiga bo‘lgan qiziqishi sundi. “Inter” esa hozirda Martines bilan yangi shartnoma borasidagi muzokaralarni boshlab yuborgan.

Kallum Hadson-Odoi “Chelsi”

Da’vogar: “Bavariya”

“Chelsi”ning transfer bozoridagi shiddatli harakatlaridan so‘ng londonliklar o‘zining bir qator futbolchilarini ijaraga berib yuborishi aniq edi. Hadson-Odoi esa ko‘plab grand klublar, xususan, “Bavariya”ni ham jiddiy qiziqtirib qo‘ygandi. Myunxenda 19 yoshli qanot hujumchisining qobiliyati va iste’dodiga yuqori baho berildi. Aslida Myunxen klubi uni ancha oldin, 2019-yilda qo‘lga kiritmoqchi bo‘lgandi. 2020-yilning oktabr oyiga kelib, Germaniya chempionlari yana Hadsonga qo‘l uzatdi. “Bavariya” “aristokratlar”ga 70 million yevro to‘lash majburiyati bilan futbolchini ijaraga  berishni so‘radi. Klublar o‘rtasida dastlabki kelishuvga erishilgandi ham, ammo so‘nggi pallada Frenk Lempard masalaga aralashib, Hadsonni Londonda olib qoldi.

Mario Balotelli “Breshia”

Da’vogar: “Jenoa”

So‘nggi bir necha oydan beri Balotellining kelajagi noaniqligicha qolmoqda. “Breshia” B Seriyaga tushib ketganidan keyin Marioning jamoada qolmasligi aniq bo‘lgandi. O‘z navbatida klub rahbariyati ham xulq-atvori va yuqori maoshi tufayli futbolchidan xalos bo‘lishni xohlamoqda. Shu bilan birga tomonlar o‘rtasidagi shartnomaning bekor qilinganligi haqida hali ham aniq ma’lumot berilmagan. Balotelli hozircha hech qayerda o‘ynamayapti. Sentabr oyida forvard “Jenoa”ga o‘tishga yaqin edi, biroq Genuya klub Eldor Shomurodov variantini ma’qul ko‘rdi. Bundan tashqari, unga “Beshiktosh” va Braziliya klublaridan ham qiziqish borligi aytildi. Mashhur agent Mino Rayola esa mijozining Yevropada qolishiga ishonmoqda. Voqealar rivojini esa vaqt ko‘rsatadi.

Kalidu Kulibali “Napoli”

Da’vogar: “Manchester Siti”

Kulibalining “Napoli”dan ketishi haqidagi mish-mishlar bir necha oy davomida tinmadi. “Manchester Siti” haqiqatan ham 29 yoshli senegallikni o‘z safiga qo‘shib olishga jiddiy bel bog‘lagandi. Biroq italyanlar bilan kelishish har doim ham oson bo‘lmagan. “Shaharliklar” neapolliklarga futbolchi borasida bir nechta takliflar yubordi, ammo ularning barchasiga salbiy javob qaytarildi. Kulibalini qo‘lga kiritish borasidagi uzoq va muvaffaqiyatsiz urinishlardan so‘ng “Siti” tinchgina “Benfika”dan Ruben Diashni sotib oldi, qo‘ydi.

Arkadiush Milik “Napoli”

Da’vogar: “Yuventus”

“Shoshgan qiz ...” degan maqol aynan Milik hikoyasiga har jabhada mos tushadi: Andrea Pirlo “Yuventus” boshqaruviga kelishi bilan jamoa faol tarzda forvard izlay boshladi. Milik esa asosiy nomzodlar qatorida qayd etildi. Turin klubi futbolchi bilan shaxsiy kelishuvga ham erishgandi. Bundan havolangan polshalik futbolchi joriy mavsum oxirida yakunlanadigan shartnomasini uzaytirishni istamasligi to‘g‘risida ochiqchasiga “Napoli”ga ma’lum qildi. Ammo kutilmaganda “Yuventus” fikridan qaytib qoldi va Alvaro Moratani ijaraga oldi. Bu vaqtga kelib, neapolliklar Milikning o‘rniga Viktor Osimhenni sotib olib bo‘lgandi. Natijada Milik ham Turindan, ham issiq joyidan quruq qoldi (asosiy tarkibdagi o‘rni nazarda tutilmoqda). Hozircha uning o‘zi ham kelgusi faoliyatini qayerda davom ettirishni bilmaydi.