O‘tgan 2024-yil davomida ayrim mansabdor, deputat va hokimlarning chiqishlari bahs-munozaralarga sabab bo‘lib, tarmoqlarda muhokamalar markazida turdi. “Daryo” shularning bir nechtasini jamladi.
Dorixonalarga do‘st shifokorlar
Yil boshida “Dok-1 Maks” ishi ayni avjiga chiqqan vaqtda hokimlarning shifokorlarga “hujumi” boshlanib ketdi. Surxondaryo hokimi Ulug‘bek Qosimov yig‘ilishlarning birida bemorlarni dorixonalarga yo‘naltirib pul ishlashni kasb qilgan shifokorlar borligini aytib chiqdi.
Hayronman, nafsi hakalak otgan shifokorlar, tibbiyot birlashmalarida ishlayotganlar, dorixonadagilar, prezident topshiriq berganidan keyin ham xalqni aldashdan umuman tap tortmayapti. Undan ko‘ra davolab, kasalni tuzatib, juda och qolib ketgan bo‘lsang, puling yetmayotgan bo‘lsa, yordam so‘ragin. Nima qilasan bo‘lmaydigan dorini ichirib, bechorani qiynab, bir joyini davolab, ikkinchi joyini kasal qilib?, degandi Ulug‘bek Qosimov.
Hamkasbidan ortda qolmay degan Toshkent viloyati hokimi Zoir Mirzayev esa shifokorlarga qarata “kasalxona kreslosini nikohlab olib, dorini ham ota-bobodan qolgan firmadan sotib olishga o‘rgangan ekansan”, deb ayblagan va ularning mahalliy dorilarni sotib olmayotganini tanqid qilgan.
Monetizatsiya qachon ochiladi?
O‘zbekistonda YouTube monetizatsiyasiga cheklov qo‘yilgan. Raqamli texnologiyalar vaziri Sherzod Shermatov ushbu to‘siq qachon olinishi haqidagi savolga har gal aylantirib javob beradi.
-Si66ntUA-DkHkxIOY.jpg)
YouTube’da ishlayotgan monetizatsiyadan foydalaning, deya vazir o‘zbek yutuberlariga inglizcha kontent tayyorlashni tavsiya qilgan.
Sherzod Shermatovning javobiga jurnalist Muhrim Aʼzamxo‘jayev “Yegani noningiz bo‘lmasa, pirojniy yeng”, degandan bo‘libdi. Mantiqqa gap yo‘q lekin”, deya istehzo qilgan.
“Tegma padarimga”
Sirdaryo hokimi Akmaljon Mahmudaliyev o‘zini insofli va maʼnaviyatli deb hisoblaydi chog‘i, u qo‘l ostidagi ayrim rahbarlarni maʼnaviyatsizlikda ayblab, bir nechtasini ishdan olish bilan tahdid qilgan.
Noinsof tashkilot rahbarlari maʼnaviyatga eʼtiborsiz bo‘lgani uchun arizasini olaman. Necha marta ogohlantirish berdik, ataylab kuzatib yuribman. Maʼnaviyat nima ekanini tushunmayapsanlarmi? Ayb ish qilib qo‘ygan boladek yerga qarab turaverasan, noinsof, deydi masʼullarni koyigan hokim.
Viloyat hokimi rahbarlarga “maʼnaviyatli bo‘linglar”, deb turgan bir paytda Boyovut hokimi Dilfuza Uralova fermerga kuch ishlatib, “padaringga laʼnat, eshak”, deya haqorat qilgan audio tarqaldi.
Anglanishicha, fermer hokimdan marhum otasini haqorat qilmaslikni so‘ragan: “Bilasanmi mening padarim qachon o‘lib ketgan? Tegma padarimga”, degan. Hokim esa “Tegaman, yuz marta teginaman, noinsof. Iflos, nimaga qilib qo‘ymading?”, deya javob qaytargan.
Janjaldan keyin fermer yig‘ilish o‘tkazilayotgan xonadan olib chiqib ketilgan. Dilfuza Uralova esa yonidagi xodimga fermerning oyoq-qo‘lini bog‘lab olib ketib, qamab qo‘yish haqida IIBga topshiriq berishni buyurgan.
Ishxonadagi maishat
Buxoroda qurilish inspeksiyasi rahbari Bahodir Toshev kursdoshlariga ziyofat qilib bergani joy topolmaganmi, ularni ishxonasiga chaqirgan. U inspeksiya binosida jonliq so‘yib, xatm qilayotganini, tadbirdan so‘ng spirtli ichimlik ichish uchun sharoit hozirlaganini aytgan.
Mehmonlar kelgani va ular maishat qilgan yo qilmagani nomaʼlumligicha qolaverdi, lekin Bahodir Toshev ishdan olindi.
Xalq puli — davlat puli
Qashqadaryo adliya boshqarmasi boshlig‘i Salohiddin Nuriyev maktab davrida iqtisod fanidan qanday bahoga o‘qiganini bir anjumanda ko‘rsatib berdi.
Unga blogerlardan biri davlat xizmatchilarini ijtimoiy tarmoqlarda tanqid qilish taqiqlanadigan bo‘lsa, davlat byudjetidan oylik olmasligi kerakligini, chunki ular xalq to‘lagan soliqlardan oylik olayotganini aytgan.
Soliqni hamma to‘laydi, bitta siz emas. Shu jumladan, oylik olayotgan odamning o‘ziga ham to‘lagan solig‘ining maʼlum bir qismi aylanib keladi. Xalqning mulki, xalqning puli degan narsa bu davlat byudjetiga o‘tdimi, davlatning puliga aylanadi o‘z-o‘zidan. U qanaqa yo‘l bilan shakllanishi ikkinchi masala. Chunki unda hamma ishtirok etadi, degan bunga javoban mansabdor.
Poytaxt hokimining reydi
Toshkent shahar hokimi etib tayinlanganidan buyon biror marta matbuot anjumani o‘tkazmagan Shavkat Umurzoqov do‘konlardan birida “reyd” o‘tkazdi. Tadbirda o‘riklar solingan yashikni qo‘liga olib, mahsulot isteʼmolga yaroqsiz ekanini aytgan.
Bular aholiga nima sotyapti? Qani SES, qani Soliq? Bu yoqqa kel. Qayoqqa qarayapsan? Odamlar buni yeb, ertaga zaharlansinmi? Olmalarning suvlari chiqib ketgan. Ko‘r, mog‘orlab yotibdi. Do‘konda yong‘in xavfsizligi taʼminlanganmi? Qani MCHS? Nimaga senlar yurmaysanlar, uxlab yotibsanlar? Bu yerni do‘kon emas, “sklad” qilib tashlashgan, degan hokim.
Video tarmoqlarda keskin tanqidlar bilan kutib olindi. Jumladan, jurnalist Anora Sodiqova hokim “kolxoz” rahbari emasligini, tadbirkor bilan qo‘pol muomala qilish unga yarashmasligini aytib o‘tgandi.
Parlamentdagi antiqa so‘rov
Parlamentda o‘tgan yig‘ilishlarning birida tanaffusga chiqish masalasida yuqori palataning oltin qoidasiga zid ravishda kamchilik ko‘pchilikning qaroridan ustun keldi.
Reglament bo‘yicha tanaffusga chiqishimiz kerak. Yana 4 ta asosiy masalamiz qoldi. Hozir yoki tanaffus qilmasdan davom ettirishimiz yoki tanaffus qilib, soat uchda davom ettirishimiz mumkin. Soat to‘rtda Hukumat soati bor. Nima deysizlar?, deya o‘rtaga savol tashladi spiker Nuriddinjon Ismoilov.
Tanaffus qilmasdan davom ettirish haqidagi taklif ovozga qo‘yildi. Natijalarga ko‘ra, 89 nafar deputat tanaffussiz davom ettirish taklifini qo‘llab-quvvatladi, 13 nafari qarshi bo‘ldi, bir kishi betaraf yana 15 nafar xalq vakili ovoz bermaslikka qaror qildi.
Shundan so‘ng spiker taklifni yana ovozga qo‘ydi. Bu safar qo‘llab-quvvatlovchilar 89 nafarga, qarshilar esa 22 nafarga yetdi.
“Men tushunmadim, nima qilamiz, davom etaylikmi? Yoki tanaffus eʼlon qilamizmi?”, deya takror so‘radi spiker Ismoilov.
Ushbu taklif bo‘yicha fikr bildirgan deputat Jahongir Shirinov “kamchilik ko‘pchilikka bo‘ysunishi kerakligi va ko‘rib chiqishni davom ettirish kerak”ligini aytdi. Spiker o‘rinbosari Alisher Qodirov esa “Men ishni davom ettirishga roziman, lekin bitta narsani hisobga olishimiz kerak, 22 odam hozir kayfiyat bilan ishlamaydi”, dedi.
Shundan keyin parlament yig‘ilishida kam ovoz to‘plagan bo‘lsa-da, “tanaffusga chiqish” tarafdorlari g‘alaba qozondi.
Keyinroq Qonunchilik palatasining o‘sha paytdagi spikeri o‘rinbosari Odiljon Tojiyev ushbu vaziyatda spiker to‘g‘ri qaror qabul qilganini aytgandi.
Qo‘lidan baloyam kelmaydigan jurnalistlar
Andijon hokimi Shuhratbek Abdurahmonovning chiqishlari o‘ziga xosligi va muhokama o‘chog‘ida qaynashi bilan farqli. Shunday chiqishlarning birida u jurnalistlarning qo‘lidan hech vaqo kelmasligini iddao qilgan.
Mening gaplarimdan kovak qidirmalaring, bir narsalar qidirmalaring ovora bo‘lib. Qo‘llaringdan baloyam kelmaydi baribir. Ming o‘ylaganing bilan soching oqaradi yo to‘kiladi, xolos, degan Shuhrat Abdurahmonov.
Keyinroq “viloyat rahbarining bu gapi boshqa davrada, boshqa insonlarga qaratilgan edi”, deya izohlangandi.
Haqiqatan jurnalistlarning qo‘lidan “baloyam kelmadi”, hokim har doimgidek suvdan quruq chiqdi.
Nazarbekovcha javoblar
Madaniyat vaziri Ozodbek Nazarbekov qochirimlari bilan el “nazariga” tez-tez tushib turadi. U matbuot anjumanlarining birida 2 milliard so‘m mablag‘ sarflangan “Ovoz” loyihasiga nisbatan bildirilayotgan eʼtirozlarga sarflangan pulni o‘z yonidan qaytarib to‘lashga tayyorligini aytgandi.
“Sarflangan 2 milliard so‘mga malomat qilaversanglar, shu pulni hozir uyimni sotib bo‘lsa ham, beraman”, degan edi o‘shanda u. Ammo vazir hozirgacha pulni qaytarganicha yo‘q.
U “madaniyat sohasida davlat regulyator bo‘lmasligi, vazirlik yopilishi kerakligi” haqidagi savolga Amerikadan javob izlashni aytgan.
To‘g‘ri, savolning oyog‘i qayerda turgani muhim. Bu savolning oyog‘i Amerikaning narigi yog‘ida turibdi. Baraka topgurlar, oyog‘ingizni ota-onangiz, bobolaringiz bosgan izga qo‘ying-da, bu savol chiqmaydi sizdan. Boya tushuntirdim, madaniyat sohasi — qush, buni shunday (siqib) ushlash kerak, boshqa imkoni yo‘q. Ochsangiz ham, manfaat bermaydi, faqat buzg‘unchilik olib kiradi. Baraka topgurlar, dunyoni ko‘ringlar, sog‘lom odamsizlar-ku.
Erkinlik berib yuborilgan joyda sanʼatkorlar hamma yerni buzyapti-ku, rasvo qilib yuboryapti-ku. Shuning uchun men erkinlik bermaylik, demoqchi emasman, taqiqlarga mutlaq qarshiman. Lekin erkin odamning intellekti shunga loyiq bo‘lishi kerak. U to‘rt devorning ichida ham jinoyat qilmasligi kerak. Ana o‘sha kun kelganda erkinlikni bemalol majburlab beramiz, kerak bo‘lsa. “Yo‘q, bo‘lmayman” desa ham, “Yo‘q, sen erkin yashashing kerak” deymiz. Lekin bugun butun jamiyat shunga loyiq deb aytolmaymiz-ku. Bu savolni vijdonimizga qo‘yaylik, degan vazir.
Janob Nazarbekov “nega festivallar ko‘payib ketdi”, degan savolga ham o‘z uslubida javob bergan.
Sizlar ko‘p savol berasizlar bizga: maqom festivali qilyapsizlar, baxshichilik, hunarmandlar festivallari qilyapsizlar, bular kerakmi, undan ko‘ra asfalt qilgan yaxshimasmi, degan millionta har xil fikrlar bor. Lekin hozir bu, kechirasiz-u, bitta ko‘chani asfalt qilgandan ko‘ra muhimroq, deb aytgandi madaniyat vaziri.
Shuncha gapga bitta hayfsan
Nafaqat viloyat hokimlari, tuman rahbarlari ham so‘kinish “sanʼati”ni bot-bot ko‘rsatib turadi. Qo‘shrabot hokimi Dilshod Shakarboyev o‘rinbosari va xodimlarini shunday “siylagan”.
Noinsoflar, faqat men aytgan odamni topadi bular. O‘zing top deyapman, hey noinsof, qurilish bo‘yicha o‘rinbosarsan-ku sen. Ishlasangiz ishlang, og‘ayni, yig‘ishtir b...t.
Men bugun 400 million beryapman desam, qancha odam gapiryapti. Bu pulga to‘liq bitadi. Bitta mahallaga so‘rasam, 400 million so‘m beramiz deyishyapti, Respublika mahallalar uyushmasi aytyapti. Qurilish bo‘yicha o‘rinbosar, quruvchi top deyapman senga, n..y, ha noinsof, p...z, b...ya, deya qurilish bo‘yicha o‘rinbosarini bo‘ralatib so‘kkan hokim.
Shundan keyin hokim boshqa kimnidir haqoratlab, ura ketgan: “Sen eshakka aytganman umumlashtirishni, ahmoq. Bu qurilishga javob beradi. Hoy noinsof, kambag‘allikka sen javob berasan, eshak, hayvon”, deya haqoratlagan g‘azabnok hokim. Uning bu qilmishi hayfsanga loyiq ko‘rilgan.
Anjancha “innovatsiya”
Andijonning nafaqat hokimi, balki boshqa tizimdagi rahbarlari ham “yangilik” qilib tinmaydi. Viloyat IIB YHX boshqarmasi boshlig‘i Abdunabi Nosirovning matbuot anjumanlarning birida maktab oldidagi yo‘l belgilarini mensimagan haydovchilarni izza qilish “tajribasi”ni yo‘lga maqtanib chiqqan.
Bitta tajriba qildik: maktab oldidagi svetofor oldiga xodim qo‘ydim. Qizil chiroqdan o‘tgan haydovchini ertalab maktab o‘quvchilarining umumiy yig‘ilishiga olib bordim-da, hamma bolalarni chaqirib, “Mana, kecha qizil chiroqda o‘tgan iflos haydovchi, mana shuni qarg‘anglar, deb o‘qituvchilar bilan ijtimoiy tarmoqlarga ham chiqardim.
Qizilda o‘tganning 2-3 tasini olib, ertalab maktab o‘quvchilarining umumiy yig‘ilishiga olib boraman. O‘zim erinmasdan boraman. Shunday qilib olib chiqdik — kamaydi, dedi. Shu sababmi yoki boshqami, keyinroq Abdunabi Nosirov ishdan ketgan.
Nasib bo‘lsa...
Bosh vazir o‘rinbosari Jamshid Qo‘chqorov Senatga bergan hisobotida yonilg‘i energiya narxlari oshishi haqidagi gapini “nasib bo‘lsa” deb boshlagan. Uning bu jumlasi tarmoqlarda tezda tomir otib, memga aylandi.
Nasib bo‘lsa, kirib kelgan 2025-yil ham “qanotli” iboralar hamda “qovun”larsiz o‘tmaydi, qarabsizki, jamoatchilik zerikmaydi.
Izoh (0)