Isroil G‘azodagi ikkita yordam tarqatish punktida oziq-ovqat olishni kutayotgan kamida 32 falastinlikni o‘ldirdi, yana 200 dan ortiq kishi jarohat oldi. Bu haqda Al Jazeera xabar berdi.
Isroil tanklari 1-iyun kuni Rafahdagi tarqatish punktida to‘plangan minglab tinch aholiga qarata o‘t ochgan. Oqibatda kamida 31 kishi halok bo‘lgan. Ko‘p o‘tmay, G‘azo shahridagi Netzarim yo‘lagi janubidagi xuddi shunday taqsimlash punktida sodir bo‘lgan otishmada yana bir kishi o‘lgan.
Yordam Isroil va AQSH tomonidan qo‘llab-quvvatlanadigan G‘azo gumanitar jamg‘armasi (G‘GJ) tomonidan tarqatilmoqda. BMT va boshqa yordam guruhlari jamg‘arma bilan hamkorlik qilishdan bosh tortgan.
Ular jamg‘arma betaraflikdan yiroq ekanini ta’kidlab, uni Isroilning G‘azoni egallashga qaratilgan harbiy maqsadlariga erishishi uchun tuzilgan deb hisoblaydi.
Hujumga guvoh bo‘lgan Abu Saoudga ko‘ra, Isroil harbiylari yordam tarqatish nuqtasiga qarab harakatlanayotgan odamlarga o‘q uzgan. Olomon taxminan 300 metr uzoqlikda bo‘lgan. U o‘q yegan ko‘plab odamlarni ko‘rganini, jumladan, voqea joyida halok bo‘lgan bir yosh yigitni eslab o‘tgan.
Biz unga yordam bera olmadik, dedi u.
Al Jazeera telekanali muxbiri Hind Khoudary gumanitar yordamning ahamiyatiga to‘xtalgan. U falastinliklar bolalariga “bitta ovqat topish” uchun jonidan ayrilayotganini aytdi.
Shuning uchun falastinliklar yordam tarqatish nuqtalariga bormoqda, garchi ular bahsli deb hisoblansa ham. Bu nuqtalarni AQSH va Isroil qo‘llab-quvvatlaydi, lekin falastinliklarning boshqa chorasi yo‘q.
Falastinliklarga tarqatilayotgan oziq-ovqat to‘plamlari ham amalda yetarli emas. Biz bir kilo un, bir-ikkita makaron qutisi, bir-ikkita loviya konservasi haqida gapiryapmiz — bu to‘yimli emas. Bugungi kunda G‘azodagi bir oila uchun bu yetarli emas, degan u.
Jamg‘arma ma’lumotlariga ko‘ra, falastinliklar oziq-ovqat olish uchun yig‘ilganda Isroil askarlari “ogohlantiruvchi o‘q” uzgan. Ular o‘nlab odamlar halok bo‘lgani haqidagi xabarlarni rad etgan.
Isroil armiyasi bayonotida “gumanitar yordam tarqatish obyektida sodir bo‘lgan o‘t ochish oqibatida yetkazilgan jarohatlar haqida hozircha ma’lumotga ega emasligi” va hodisa hali ham ko‘rib chiqilayotgani aytiladi.
G‘azodagi hukumat hujumlarni qoralab, G‘azo gumanitar jamg‘armasining tarqatish punktlarini “gumanitar yordam punktlari emas, ommaviy o‘lim tuzoqlari” deb ta’rifladi.
Izoh (0)