Mars Incorporated murojaati asosida qonunbuzilishga qarshi chora ko‘rildi, deb xabar berdi Raqobat qo‘mitasi matbuot xizmati “Daryo”ga.
Maʼlum qilinishicha, qo‘mitaga Mars Incorporated XK tomonidan ishlab chiqarilgan mahsulotlarni sotishda M&M’s tovar belgisidan foydalanishini maʼlum qilib, o‘zining ishonchli vakili orqali murojaat qilgan.
Murojaatda Surxondaryo viloyatida faoliyat yuritayotgan “Surxon Oshpazi” MCHJ tomonidan ishlab chiqarilayotgan mahsulotlarda qo‘llanilgan TWIX va BOUNTY nomli tovar belgilari Mars Incorporated kompaniyasining ushbu mahsulotlari tovar belgilariga isteʼmolchilarni chalkashtiradigan darajada o‘xshashlikka egaligi sababli ularni haqiqiy mahsulot deb qabul qilish ehtimolini yuzaga keltirayotgani taʼkidlangan.
O‘tkazilgan o‘rganishlar davomida, “Surxon Oshpazi” MCHJ tomonidan ishlab chiqarilayotgan mahsulotlardagi belgilangan tovar nomlari haqiqatdan ham xorijiy kompaniya tovar belgilari bilan adashtirish darajasida o‘xshash ekani tasdiqlangan.
Natijada “Surxon Oshpazi” MCHJ harakatlarida qonun va qaror bilan tasdiqlangan talablar buzilgan deb topildi.
Qo‘mita huzuridagi maxsus komissiya qaroriga asosan “Surxon Oshpazi” MCHJga nisbatan moliyaviy jarima qo‘llanildi. Shuningdek, qonunbuzilish holatini bartaraf etish va bunday holatlarga yo‘l qo‘ymaslik bo‘yicha bajarilishi majburiy bo‘lgan ko‘rsatma berildi.
Izoh (0)