Yerga yopirilgan magnit bo‘roni 67 soatdan ortiq davom etmoqda. Magnit bo‘roni davomiyligi bo‘yicha rekord yangilanishi mumkin. Bu haqda RTVI xabar berdi.
2017-yilda qayd etilgan avvalgi rekord 69 soatni tashkil etgandi. Mutaxassislarning ta’kidlashicha, sayyoraning magnit maydoni holatini aks ettiruvchi maxsus indeks anomaliya boshlanganidan 36 soat o‘tgach sariq darajaga tushgan. Yer yaqinidagi Quyosh shamoli xususiyatlari barqarorlashib, normal qiymatlarga yetgan bo‘lsa-da, geomagnit bo‘ronlar hali ham kuzatilmoqda.
“Umuman olganda, 1-iyundagi ekstremal cho‘qqilar fonida bo‘ronlarning hozirgi darajasi kuchsizdan o‘rtachagacha bo‘lgan diapazonda turibdi. Ammo bu vaqt ichida magnit maydon tomonidan yutilgan umumiy energiya qiymati juda katta hisoblanadi”, dedi Rossiya Fanlar akademiyasi Kosmik tadqiqotlar institutining Quyosh astronomiyasi laboratoriyasi.
Olimlarga ko‘ra, matematik prognozlar hali ham vaziyatning tezda barqarorlashishini ko‘rsatmoqda. Lekin hozirgi holat 2017 yildagi rekorddan oshish yoki oshmasligi noma’lum bo‘lib qolmoqda. 31-mayga o‘tar kechasi astronomlar Quyoshda katta chaqnashni qayd etgan. Intensivlik bo‘yicha bu chaqnash o‘tgan 2024-yilning may oyida kuzatilgan shunga o‘xshash hodisalardan biroz kuchsizrog‘i hisoblanadi.
Izoh (0)