Tadbirkorlarni quyosh panellari o‘rnatishga majburlanayotgani yuzasidan O‘zLiDeP munosabat bildirdi

Avvalroq ijtimoiy tarmoqlarda so‘nggi kunlarda mamlakatda biznes subyektlarini quyosh panellari o‘rnatishga majburlashga bo‘lgan urinishlar yuz berayotgani to‘g‘risida xabarlar tarqalgan edi. Ushbu holatga O‘zLiDeP o‘z munosabatini bildirdi va yana bir bor tadbirkorlar bilan munosabatda yuzaga keladigan barcha masalalar qonunchilik doirasida amalga oshirilishi lozimligini taʼkidlaydi.

Ushbu holatga O‘zLiDePning nuqtayi nazari aniq – hech kim tadbirkorni uning istagiga zid holda biror narsaga majburlashi mumkin emas. Bunday hatti-harakatlar tadbirkorlarning huquq va erkinliklarini kafolatlash yo‘lida davlatimizda qabul qilingan qonunchilikka zid, deyiladi xabarda.

O‘zLiDePning I Kongressida tasdiqlangan saylovoldi dasturida ham aynan shu kabi holatlarni oldini olish uchun davlat organlari mansabdor shaxslarining tadbirkorlik faoliyatiga aralashuvini qatʼiy taqiqlash uchun barcha zarur choralarni ko‘rish yuzasidan vazifalar belgilangan.

Shu bilan birga, mamlakatda muqobil energiya manbalarini kengaytirish masalasi ham saylovoldi dasturidan o‘rin olganini hisobga olgan holda ushbu ishlar majburlash yo‘li bilan emas, balki qayta tiklanuvchi energiya manbalaridan foydalanishning ustunliklari, afzal jihatlarini tushuntirish, targ‘ib qilish, tegishli moliyaviy imkoniyatlar yaratish orqali amalga oshirilishi lozim deb bilamiz.

Ijtimoiy tarmoqlarda tarqalgan ushbu maʼlumot o‘z tasdig‘ini topgan taqdirda O‘zLiDeP o‘z deputatlari orqali tegishli vazirlik va idoralarga deputatlik so‘rovlari bilan murojaat qiladi va bunday harakatlarga huquqiy baho berishni qatʼiy talab qiladi.

Ushbu muammo yuzasidan hozirda partiyaning markaziy va hududiy kengashlari tomonidan o‘rganishlar boshlangan.