Toshkent viloyatining Bo‘ka tumanida quyosh fotoelektr stansiyasining qurilish loyihasiga start berildi. Bu haqda viloyat hokimligi matbuot xizmati xabar berdi.
Loyiha Xitoyning China Datang kompaniyasi tomonidan amalga oshirilmoqda. Ochilish marosimida korporatsiya boshqaruvi raisi Chjou Ley, uning o‘rinbosari Li Chjanvey va rahbariyatning boshqa vakillari ishtirok etdi.
Quvvati 263 megavatt bo‘lgan fotoelektr stansiyasi “Bo‘ka” mahallasida joylashadi. Loyiha qiymati 150 million dollarni tashkil etadi.
Ushbu quyosh fotoelektr stansiyasini qurish bo‘yicha loyiha 2024-yil yanvarida imzolangandi. Prezidentning 24-maydagi qaroriga ko‘ra, qurilish uchun 621 gektar yer ajratilishi belgilangan bo‘lib, u qishloq xo‘jaligiga mo‘ljallangan yerlar toifasidan sanoat transport, aloqa, mudofaa va boshqa maqsadlarga mo‘ljallangan yer toifasiga o‘tkaziladi.
Investor ishlab chiqarilgan elektr energiyasini “O‘zbekiston milliy elektr tarmoqlari”ga kafolatlangan tarzda sotish majburiyatini oladi. “O‘zbekiston milliy elektr tarmoqlari” 25 yil davomida ushbu elektr stansiyasi tomonidan ishlab chiqarilgan elektr energiyasini sotib oladi.
Prezidentning “O‘zbekiston – 2030 strategiyasini Yoshlar va biznesni qo‘llab-quvvatlash yilida amalga oshirishga oid davlat dasturi to‘g‘risida”gi farmonida xorijiy investorlar ishtirokida Toshkent, Qashqadaryo, Buxoro, Namangan va Navoiy viloyatlarida 6 ta yirik quyosh elektr stansiyalarini 2024-yil yakuniga qadar ishga tushirish belgilandi.
Izoh (0)