Ko‘klam kelib, kunlar isishi bilan insonlar ko‘proq vaqtni ochiq havoda o‘tkazishni xush ko‘radi. Bahorgi quyosh nuri boshqa fasllarga nisbatan zararliroqmi? Uning teriga qanday xavfi bor? Shu kabi savollarga shifokor-onkolog, jarroh Roman Yevstratov javob berdi.
Quyosh nurining foydali tomonlari
Quyosh nurlari inson tanasida D vitamin ishlab chiqarilishi uchun asosiy manba hisoblanadi, chunki vitamin ultrabinafsha nurlari ta’sirida terida sintezlanadi. D vitamini suyaklar, tishlar o‘sishi hamda immunitet uchun zarur elementdir.
Shuningdek, quyosh nuri kayfiyatni ko‘taruvchi serotonin gormonini ishlab chiqarishda faol ishtirok etadi va insonga ko‘tarinki ruh bag‘ishlaydi. Kunduz kuni tanadagi serotonin yetarli miqdorda bo‘lgani bois tunda uyqu sifati yaxshilanadi.
Bundan tashqari, teriga quyosh nuri ta’sir qilganda qonda azot oksidi hosil bo‘ladi. U qon bosimini pasaytirishga yordam beradi va yurak xuruji, insult kabi xavfli kasalliklarning oldini oladi.
Quyosh nurining zararli tomonlari
Uzoq vaqt davomida quyosh ostida qolish terida yengil qizarishdan tortib saraton kabi xavfli teri muammolariga olib kelishi mumkin. Teri saratoni dunyodagi eng keng tarqalgan saraton turlaridan biri bo‘lib, o‘z vaqtida va to‘g‘ri davolanmasa, o‘limga olib kelishi mumkin.
Quyosh nurlarining zarar va foydalari haqida gapiradigan bo‘lsam, har qanday onkolog beradigan tavsiyani aytaman: ochiq quyoshda uzoq vaqt qolish har qanday yoshdagi insonga mumkin emas, — dedi shifokor-onkolog, jarroh Roman Yevstratov.
Davo va chiniqish maqsadida quyosh nurining shifobaxsh xossasi — quyosh vannasidan foydalanishda ham alohida ehtiyotkorlik talab etiladi. Quyosh vannasida ultrabinafsha va ionli nurlanish xavfi yuqoridir. Inson hayoti davomida terida to‘plangan barcha quyosh nurlanishi yig‘ilib, vaqt o‘tishi bilan turli teri kasalliklari bilan namoyon bo‘ladi. Bular ichida progressiv bo‘lmagan xavfsiz va kattalashib boruvchi xavfli o‘simta kasalliklari ham bor.
Tabiiy quyosh nuri ham, solyariy ham teri uchun birdek zararlidir. Shuning uchun tashqariga chiqishdan yarim soat avval quyoshdan himoyalovchi vositalar, masalan SPF faktorli krem surtish tavsiya etiladi.
Bahor faslidagi quyosh xavflimi?
Bahorgi quyosh nuri yoz fasli bilan deyarli bir xil ta’sirga ega. Bahorda quyosh nurining foydasi ko‘proq psixologik jihatdan izohlanadi. Qish fasli tugagach, charaqlab turgan quyosh har qanday inson kayfiyatini ko‘taradi va umumiy emotsional holatini yaxshilaydi.
Izoh (0)