Toshkentdagi do‘konlarda kannabis ta’mli energetik ichimlik sotilayotgani haqida xabarlar tarqalgandi. Sanitariya-epidemiologik osoyishtalik va jamoat salomatligi qo‘mitasi bunga munosabat bildirdi.
Ma’lum qilinishicha, Chexiyada ishlab chiqarilgan, O‘zbekistonga All Trade AT MCHJ tomonidan olib kelingan SoStoned nomli 330 ml energetik ichimlik mahsulotiga sanitariya-gigiyenik, bakteriologik, parazitologik va radiologik tekshiruvlardan so‘ng (olib kelingan partiyasiga) qo‘mita tomonidan sanitariya-epidemiologik xulosa rasmiylashtirib berilgan.
Ushbu energetik ichimlik qadog‘ida tarkibida suv, shakar, limon kislotasi, sitrat natriy, taurin, kofein, kanaplya ta’mini beruvchi aromatizatorlar, rang beruvchi karamel, vitamin V2, V6, V12 va pantoten kislotasi borligi ko‘rsatib o‘tilgan.
Laboratoriya tekshiruv natijalariga ko‘ra, ichimlik tarkibida xavfsizlik ko‘rsatkichi hisoblangan zaharli yoki inson salomatligi uchun zararli moddalar aniqlanmagan.
O‘zbekiston hududida o‘rnatilgan tartiblarga rioya etgan holda olib kirilgan mahsulotning har bir partiyasiga laboratoriya tekshiruvlari natijalariga ko‘ra, sanitariya-epidemiologik xulosa rasmiylashtirib beriladi.
Qayd etilishicha, ushbu mahsulot O‘zbekistonga 2023-yilning noyabr oyidan buyon bojxona orqali rasmiylashtirib olib kirilayotgangan bo‘lsa-da, bugungi kunga qadar mahsulotning sifatsizligi yoki uni iste’mol qilish oqibatida zaharlanganlik to‘g‘risida murojaat va arizalar kelib tushmagan.
Izoh (0)