Тошкентдаги дўконларда каннабис таъмли энергетик ичимлик сотилаётгани ҳақида хабарлар тарқалганди. Санитария-эпидемиологик осойишталик ва жамоат саломатлиги қўмитаси бунга муносабат билдирди.
Маълум қилинишича, Чехияда ишлаб чиқарилган, Ўзбекистонга All Trade AT МЧЖ томонидан олиб келинган SoStoned номли 330 мл энергетик ичимлик маҳсулотига санитария-гигиеник, бактериологик, паразитологик ва радиологик текширувлардан сўнг (олиб келинган партиясига) қўмита томонидан санитария-эпидемиологик хулоса расмийлаштириб берилган.
Ушбу энергетик ичимлик қадоғида таркибида сув, шакар, лимон кислотаси, ситрат натрий, таурин, кофеин, канапля таъмини берувчи ароматизаторлар, ранг берувчи карамел, витамин В2, В6, В12 ва пантотен кислотаси борлиги кўрсатиб ўтилган.
Лаборатория текширув натижаларига кўра, ичимлик таркибида хавфсизлик кўрсаткичи ҳисобланган заҳарли ёки инсон саломатлиги учун зарарли моддалар аниқланмаган.
Ўзбекистон ҳудудида ўрнатилган тартибларга риоя этган ҳолда олиб кирилган маҳсулотнинг ҳар бир партиясига лаборатория текширувлари натижаларига кўра, санитария-эпидемиологик хулоса расмийлаштириб берилади.
Қайд этилишича, ушбу маҳсулот Ўзбекистонга 2023 йилнинг ноябрь ойидан буён божхона орқали расмийлаштириб олиб кирилаётганган бўлса-да, бугунги кунга қадар маҳсулотнинг сифатсизлиги ёки уни истеъмол қилиш оқибатида заҳарланганлик тўғрисида мурожаат ва аризалар келиб тушмаган.
Изоҳ (0)