Xorazm, Buxoro, Andijon va Farg‘ona viloyatlarida tabiiy resurs tarmoqlariga noqonuniy ulanish holatlari fosh etildi. Bu haqda Bosh prokuratura huzuridagi departament xabar berdi.
Qayd etilishicha, departamentning Qo‘shko‘pir tuman bo‘limi tomonidan tergovga qadar tekshiruv o‘tkazilgan. Tekshiruvda “B.S.” fermer xo‘jaligi rahbari va boshqalar o‘zaro til biriktirib, tijorat maqsadida “MTZ-80” motorli suv nasosi uskunasini tabiiy gaz tarmog‘iga to‘g‘ridan to‘g‘ri ulab, 417 million so‘mlik tabiiy gazdan noqonuniy foydalangani aniqlangan.
Departamentning Uchko‘prik tuman bo‘limi tomonidan o‘tkazilgan tergovga qadar tekshiruvda “Sh.O.” MCHJ rahbari O.Y. MCHJ ishlab chiqarish sexidagi uskunalarni umumiy foydalanishdagi gaz tarmog‘iga yashirincha ulab, 286,2 million so‘mlik tabiiy gazdan noqonuniy foydalangani ma’lum bo‘lgan.
Shu kabi, departamentning Buloqboshi tuman bo‘limi tomonidan va “O‘zenergoinspeksiya”ning viloyat boshqarmasi xodimlari hamkorligida o‘tkazilgan tergovga qadar tekshiruvda “N.F-M.” MCHJ energetigi A.Z. va boshqalar MCHJning ishlab chiqarish uskunalarini tijorat maqsadida umumiy foydalanishdagi elektr tarmog‘iga to‘g‘ridan to‘g‘ri ulab, 230 million so‘mlik elektr energiyasidan noqonuniy foydalangani aniqlangan.
Departamentning Shofirkon va Romitan tumani bo‘limlari tomonidan o‘tkazilgan tergovga qadar tekshiruvda esa “I.F.” fermer xo‘jaligi hamda “Ch.K.” MCHJ masʼul shaxslari elektr suv nasoslarini umumiy foydalanishdagi elektr tarmog‘iga tijorat maqsadida to‘g‘ridan to‘g‘ri ulab, jami 122,6 million so‘mlik elektr energiyasidan noqonuniy foydalangan aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Farg‘ona shahrining Qirguli mavzesida 806,9 million so‘mlik gazdan noqonuniy foydalangan novvoyxona aniqlangani to‘g‘risida xabar berilgandi.
Izoh (0)