“Andijon biokimyo zavodi” ustav kapitalidagi 96 foiz davlat aksiyalari 101,3 milliard so‘mga Jasmin Gold Group MCHJga sotildi. Bu haqda Davlat aktivlarini boshqarish agentligi xabar berdi.
Qayd etilishicha, raqobat muhiti taʼminlangan savdo jarayoni natijasida, investorlar tomonidan kelib tushgan arizalar Yevropa Ittifoqi va AQSHning, shuningdek yirik xalqaro moliya institutlarining sanksiyalari ro‘yxatiga kiritilmagani yuzasidan o‘rganilib, mazkur shartlarga muvofiq keladigan talabgorlar xususiylashtirish jarayonining keyingi – Majburiyatga ega bo‘lgan takliflar (BO)ni taqdim etish bosqichiga o‘tkazilgan.
O‘z navbatida, konsultant tomonidan “Andijon biokimyo zavodi” ustav kapitalidagi davlat aksiya paketlarini yaxlit paket (96 foiz) sifatida sotish bo‘yicha takliflar qabul qilingan.
Natijada, sotib olish uchun qo‘yilgan talablarga to‘liq javob bergan, kelajakda Korxona faoliyatini barqaror rivojlanishini taʼminlay oladigan va ishlab chiqarish jarayonlarini to‘liq davomiyligini shakllantirishga salohiyatli bo‘lgan Jasmin Gold Group MCHJ eng yuqori narx taklifi bilan savdo g‘olibi deb topilgan.
Taʼkidlanishicha, xaridorning taklifi konsultant tomonidan hisoblangan korxonaning indikativ narxlar oralig‘ining yuqori qismida joylashgan hamda korxonaning baholangan qiymatidan yuqori. Korxonani xususiylashtirish natijalari Davlat aktivlarini xususiylashtirish va xususiylashtirish jarayonlarini muvofiqlashtirish davlat komissiyasining tegishli qarori bilan maʼqullangan.
Maʼlumot uchun, 2023-yilda “Andijon biokimyo zavodi” tomonidan 1 mln dal spirt ishlab chiqarilgan bo‘lib, sof foydasi 10,1 milliard so‘mni, sof aktivlari 71,5 milliard so‘mni va jami majburiyatlari 17,3 milliard so‘mni tashkil qilgan.
Jasmin Gold Group haqida
“Uzorg.info” ma’lumotlariga ko‘ra, Jasmin Gold Group MCHJ 2016-yilda ro‘yxatga olingan bo‘lib, uning 100 foiz ulushiga Sa’dulla Yusupov egalik qiladi.
Tashkilot manzili sifatida Qoraqalpog‘iston Respulbikasi Mo‘ynoq tumani, MCHJ faoliyati esa “chorva mollariga tayyor ozuqalar ishlab chiqarish” sifatida ko‘rsatilgan.
Kompaniyaning ustav fondi — 448,3 million so‘mni tashkil etadi.
- Eslatib o‘tamiz, iyun o‘rtalarida Davlat aktivlarini boshqarish agentligi “Milliy banklararo protsessing markazi” (Humo to‘lov tizimi) ustav kapitalidagi davlat ulushining 100 foizini ommaviy savdolar orqali xususiylashtirishni tashkil etish bo‘yicha professional konsalting kompaniyasini tanlash bo‘yicha tanlov eʼlon qilgandi.
Izoh (0)