Rossiya Premyer Ligasining (RPL) bir nechta futbolchilari — Aleksey Batrakov (“Lokomotiv”), Matvey Kislyak (“SSKA”) va Danil Kozlov (“Krasnodar”)ga tegishli ma’lumotlar Rossiyada faoliyati taqiqlangan bukmekerlik kompaniyasining xujjatlar bazasida aniqlangan. Bu haqda “Mash na sporte” Telegram kanali xabar berdi.
Manbaga ko‘ra, 2024-yil oxirida xakerlar ushbu noqonuniy bukmekerlik platformasining serveriga hujum qilib, foydalanuvchilarning ma’lumotlar bazasini qo‘lga kiritgan. Huquqbuzarlar ma’lumotlarni oshkor qilmaslik evaziga 15 million AQSh dollari talab qilishgan. Ammo kompaniya to‘lovni rad etgan va baza ommaviy ravishda internetda tarqatilgan.
Tarqalgan arxivda Batrakov, Kislyak va Kozlovga tegishli telefon raqamlari mavjud bo‘lib, ular futbolchilarning haqiqiy raqamlari bilan mos kelishi ta’kidlangan. Ma’lumotlarga ko‘ra, Batrakov va Kislyak akkauntlarida oxirgi harakatlar 2021-yilda qayd etilgan, Kozlovning akkaunti esa hozirgacha faol hisoblanadi.
Shuningdek, ushbu bazada yana 11 nafar rossiyalik futbolchi nomi mavjudligi taxmin qilinmoqda.
Agar futbolchilarning noqonuniy pul tikish faoliyati tasdiqlansa, ular diskvalifikatsiya qilinishi mumkin. Misol uchun, “Sokol” (Qozon) klubi yarim himoyachisi Aleksandr Siberkin shunga o‘xshash sabab bilan 10 yil muddatga futbol bilan bog‘liq barcha musobaqalardan chetlashtirilgan.
Eslatib o‘tamiz, O‘zbekistonda ham shunga o‘xshash holatlar kuzatilgan. Xususan, 2022-yil “Lokomotiv” va “Paxtakor” klublarida harakat qilgan gruziyalik futbolchi Kaxi Maxaradze bukmekerlik kompaniyalari bilan aloqasi sabab 5 yilga futbolga oid faoliyatdan chetlatilgan va 100 million so‘m jarima solingan edi.
Izoh (0)