O‘zbekistonda 2025-yil 1-avgustdan boshlab portlovchi va xavfli moddalarni, ularni o‘z ichiga olgan materiallarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish uchun litsenziya berishda Favqulodda vaziyatlar vazirligi bilan kelishish zarur.
Amaldagi tartibga ko‘ra, portlovchi va xavfli moddalarni, ularni o‘z ichiga olgan materiallarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish uchun litsenziya berishda Sanoat, radiatsiya va yadro xavfsizligi qo‘mitasi bilan kelishilgan. Endilikda bu tartib bekor bo‘ladi.
Vazirlar Mahkamasining “Yonish va portlash xavfi bo‘lgan muhitni yuzaga keltirishi mumkin bo‘lgan kimyoviy moddalar, shuningdek, ayrim zaharli moddalar aylanmasini tartibga solishni takomillashtirish chora-tadbirlari to‘g‘risida”gi qaroriga ko‘ra, ushbu faoliyat turlarini litsenziyalashda quyidagi talablarga rioya etilishi kerak:
- ekologiya, atrof-muhitni muhofaza qilish va iqlim o‘zgarishi vazirligining atrof-muhitni muhofaza qilish normalariga muvofiqlik talablari;
- Ichki ishlar vazirligi va YHXXning portlovchi va zaharli moddalarni, ularni ishlatgan materiallar va buyumlarni, shuningdek portlatish vositalarini maxsus transport vositalarida tashish zarurligi haqidagi talablari;
- Sog‘liqni saqlash vazirligi tomonidan tasdiqlangan normativlarga muvofiq tirik organizmga ta’sir etish darajasiga qarab I, II va III xavflilik sinflariga (o‘ta xavfli, yuqori xavfli va o‘rtacha xavfli) mansub zaharli moddalarga bo‘lgan qonunchilik talablari, shuningdek obyektning sanitar-himoya zonasini belgilash bo‘yicha normativ hujjatlar talablari;
- Favqulodda vaziyatlar vazirligining saqlash, tashish, foydalanish va utilizatsiya sohasidagi talablari.
Hujjatda keltirilishicha, Vazirlar Mahkamasi huzuridagi Sanoat, radiatsiya va yadro xavfsizligi qo‘mitasi 2026-yil 1-yanvarga qadar Tog‘-kon sanoati va geologiya vazirligi, Favqulodda vaziyatlar vazirligi, Ekologiya, atrof-muhitni muhofaza qilish va iqlim o‘zgarishi vazirligi bilan birgalikda litsenziyalanishi belgilangan zaharli moddalarni saqlash, tashish, ulardan foydalanish va yo‘q qilish talablarini nazarda tutuvchi xavfsizlik qoidalarini tasdiqlashi lozim.
Izoh (0)