“Hizbulloh” yetakchisi Naim Qosim 19-iyun kuni Eron va Isroil o‘rtasida davom etayotgan urushga javoban uning guruhi “o‘z bilganidek harakat qilishini” bildirdi. Bu haqda Al Arabiya xabar berdi.
Qosim o‘z bayonotida “Hizbulloh” ikki mintaqaviy qudratli davlat o‘rtasidagi mojaroda “betaraf emas”ligini aytdi. U guruh bu “shafqatsiz Isroil-Amerika tajovuzi oldida o‘zi xohlagandek harakat qilishini” bildirgan.
Zolim Amerika va jinoyatchi Isroil Eron xalqi va Islom inqilobi qo‘riqchilari korpusini bo‘ysundira olmaydi. “Hizbulloh” hali ham Eron tomonida turish va unga bu zulmga chek qo‘yishga yordam beradigan barcha turdagi yordam ko‘rsatishga tayyor, dedi u.
“Hizbulloh” 2024-yili Isroilga qarshi urushda halokatli yo‘qotishlarga uchragandi. Bu urush noyabr oyida o‘t ochishni to‘xtatish kelishuvi bilan yakunlangan.
19-iyun kuni AQSHning Suriya bo‘yicha maxsus vakili Tom Barrak “Hizbulloh”ni Eron va Isroil o‘rtasidagi urushga aralashmaslikdan ogohlantirgan edi. Bir vaqtning o‘zida AQSHning Turkiyadagi elchisi bo‘lgan Barrak Bayrutga birinchi tashrifini amalga oshirmoqda. U yerda Livanning yuqori martabali amaldorlari, jumladan, parlament spikeri, “Hizbulloh”ning ittifoqchisi Nabih Berri bilan uchrashgan.
“Prezident Donald Tramp nomidan aytishim mumkinki... bu juda, juda, juda yomon qaror bo‘lardi”, dedi Barrak Berri bilan uchrashuvidan so‘ng.
U shu tariqa “Hizbulloh”ning urushdagi ehtimoliy ishtiroki haqidagi savolga javob berdi. O‘tgan hafta Isroil Eronga zarba berganida, Livan Tashqi ishlar vazirligi mamlakatni har qanday mojaroga aralashib qolishdan qutqarish uchun “aloqalarni davom ettirayotganini” bildirgan.
“Qurol-yarog‘ monopoliyasi maqsadiga erishish uchun aloqalar davom etmoqda va mintaqada barqarorlik qaytganidan keyin bu yanada kuchayadi”, Livan prezidenti Jozef Aun Barrak bilan uchrashuvidan so‘ng.
Noyabrdagi o‘t ochishni to‘xtatish kelishuviga ko‘ra, “Hizbulloh” o‘z jangchilarini Livan armiyasi va Birlashgan Millatlar Tashkiloti tinchlikparvar kuchlarini hududdagi yagona qurolli kuchlar sifatida qoldirib, Isroil chegarasidan 30 kilometr uzoqlikdagi Litani daryosi shimoliga olib ketishi kerak.
Isroil o‘z qo‘shinlarini to‘liq olib chiqishi kerak, biroq ularni Livanning beshta hududida ushlab turibdi, buni mamlakat “strategik” deb hisoblaydi. Livan, shuningdek, so‘nggi paytlarda o‘nlab yillar davomida mamlakatdagi falastinlik qochqinlar lagerlariga rahbarlik qilgan falastinlik jangari guruhlarni qurolsizlantirish bo‘yicha sa’y-harakatlarni kuchaytirgan.
Izoh (0)