Isroil mudofaa vaziri Isroil Kats Eronning diniy rahbari oyatulloh Ali Xomanaiy agar Isroil bilan qarama-qarshilik siyosatini davom ettirmoqchi bo‘lsa, Saddam Husaynning taqdirini eslab qo‘yishi kerakligini bildirdi. Bu haqda Isroil Mudofaa vazirligi bayonotida ma’lum qilingan.
Katsning so‘zlariga ko‘ra, Isroil Eron hududiga zarbalar berishni davom ettiradi.
“Men Eron diktatorini harbiy jinoyatlar sodir etish va Isroil fuqarolariga raketalar uchirishni davom ettirishdan ogohlantiraman. U Isroil davlatiga qarshi xuddi shunday yo‘l tanlagan qo‘shni mamlakat diktatorining taqdirini yodda tutishi lozim”, dedi Kats.
Mudofaa vaziri Isroil avvalroq Erondagi IRIB davlat teleradiokompaniyasining Tehrondagi binosiga zarba berganini ta’kidlab, zarba nishoni Eron hukumatining boshqa tuzilmalari ham bo‘lishi mumkinligini qo‘shimcha qilgan.
Isroil armiyasi bugun “kecha targ‘ibot va tahriklovchi teleradio xizmatiga qarshi” harakat qilganidek, “Tehrondagi rejim va harbiy maqsadlarga qarshi harakat qilishni davom ettiradi, deya izoh bergan Isroil mudofaa vaziri.
Bundan avval Isroil bosh vaziri Binyamin Netanyaxu ABC telekanaliga bergan intervyusida Xomanaiyning yo‘q qilinishi hozirgi mojaroga chek qo‘yishi mumkinligini istisno qilmagan edi. Shu bilan birga, Reuters xabariga ko‘ra, ilgari Isroil go‘yoki Eron rahbarini yo‘q qilish imkoniyatini ko‘rib chiqqan, biroq Vashington, xususan, Donald Tramp bunga qarshi chiqqan.
Eron va Isroil o‘rtasidagi mojaro 13-iyun kuni Isroil armiyasi Erondagi yadro obyektlari va qo‘mondonlik punktlariga keng ko‘lamli havo hujumlarini boshlaganida keskin tus oldi. Asosiy harbiy rahbarlar, jumladan, Bosh shtab boshlig‘i va Inqilob qo‘riqchilari korpusi qo‘mondoni, shuningdek, yadro olimlari halok bo‘ldi. Eronda qurbonlar soni 220 kishidan oshdi.
Eron ballistik raketalar bilan javob qaytardi, natijada Isroil hududida 24 kishi halok bo‘ldi va 500 dan ortiq kishi yaralandi. Turkiya ham qo‘shilgan holda xalqaro hamjamiyat vaziyatning keskinlashuvidan tashvishga tushdi va Isroilning harakatlarini qoraladi.
Izoh (0)