Ukraina prezidenti Vladimir Zelenskiy mamlakat razvedkasi ma’lumotlariga tayanib Rossiya Yevropa hududida yangi harbiy operatsiyalarni tayyorlayotganini aytdi. Bu haqda “Ukrainskaya pravda” xabar berdi.
Zelenskiy Mudofaa vazirligi razvedka bosh boshqarmasi boshlig‘i Kirill Budanov hisobotidan so‘ng shunday bayonot bergan.
Biz Rossiya rahbariyatining aqliy tanazzuli chuqurlashayotganini kuzatmoqdamiz va ularning Yevropa hududida yangi harbiy operatsiyalarni tayyorlayotganini tasdiqlovchi dalillarga egamiz, dedi Zelenskiy.
Shuningdek, siyosatchi sanksiyalar Rossiya iqtisodiyotiga jiddiy zarar yetkazayotganini ta’kidladi. Prezident bu xalqaro bosimni kuchaytirish strategiyasining to‘g‘riligini tasdiqlashini aytdi.
Ukraina rahbariga ko‘ra, Kiyev razvedka tomonidan olingan faktlar haqida hamkorlarini xabardor qiladi. Mamlakat Yevropa himoyasini kuchaytirish uchun Buyuk Britaniya va Yevropa Ittifoqi bilan qo‘shma qarorlarni allaqachon tayyorlamoqda.
Rossiyaning boshqa davlatlarga ehtimoliy hujumi: mavzuga oid yangiliklar
NATO doiralaridagi manbalarga ko‘ra, Rossiya Finlyandiya va NATOning sharqiy qanotidagi boshqa davlatlarga hujum qilish rejasini ishlab chiqqan. Gap Rossiya armiyasining bir nechta bo‘linmalarining bir vaqtning o‘zida hujumi haqida ketmoqda. Unga o‘n minglab askar jalb qilinishi ehtimoli borligi aytilgan.
Financial Times nashriga ko‘ra, Rossiya Yaponiya va Janubiy Koreya bilan ehtimoliy urush uchun nishonlarning batafsil ro‘yxatini tuzgan. Ro‘yxatga 160 ta harbiy va fuqarolik infratuzilmasi obyektlari — atom elektr stansiyalari, ko‘priklar, zavodlar va qo‘mondonlik punktlari kiritilgan. 2008–2014-yillardagi maxfiy hujjatlar X-101 raketalari bilan zarbalar berishni va Yaponiya hamda Janubiy Koreyaning havo mudofaasini tekshirishni tasvirlaydi.
Yevropa diplomatiyasi rahbari Kaya Kallas Rossiya 2028-yildayoq Yevropa ittifoqiga hujum qilishi mumkinligini aytib, Yevropani mudofaa xarajatlarini oshirishga chaqirgan. NATO bilan urush 4-6 yildan keyin bo‘lishi mumkinligi ta’kidlangan.
Buyuk Britaniya Rossiya hujumiga tayyorgarlik ko‘rishni boshladi. Londonda 2005-yildan beri ilk bor favqulodda holatdagi harakatlar rejasi qayta ko‘rib chiqilmoqda. U yadroviy hujumga reaksiya va bunkerlardan foydalanish tartibini o‘z ichiga oladi.
Izoh (0)