Rasmiy tashrif bilan kelgan Iordaniya podshohi Abdulla II ibn al-Husayn 26-avgust kuni Shavkat Mirziyoyev hamrohligida O‘zbekistonda ishlab chiqarilayotgan eksportbop mahsulotlar ko‘rgazmasi bilan tanishdi.
Prezident matbuot xizmatining ma’lum qilishicha, Samarqand shahridagi Kongress markazida xorijiy bozorlar uchun xalqaro standartlarga javob beradigan keng turdagi yuqori sifatli mahsulotlar ko‘rgazmaga qo‘yilgan.
Oliy martabali mehmonga tog‘-kon, farmatsevtika, kimyo, to‘qimachilik, zargarlik sanoati, qishloq xo‘jaligi va axborot texnologiyalari kabi sohalardagi texnologik bosqichlar, ishlab chiqarish quvvatlari, innovatsiyalar va qo‘llanilayotgan eng ilg‘or uskunalar haqida batafsil ma’lumot berildi.
Ekspozitsiyadan yuqori qo‘shilgan qiymatga ega tayyor sanoat mahsulotlari namunalari: dori vositalari, tibbiy asbob-uskunalar, mineral o‘g‘itlar, to‘qimachilik, trikotaj va zargarlik buyumlari, hunarmandchilik mahsulotlari, IT yechimlari va boshqalar o‘rin olgan.
Iordaniya yetakchisi O‘zbekiston mahsulotlari va sanoat salohiyatini yuksak baholadi. Davlat rahbarlari yetakchi korxonalar kooperatsiyasini kengaytirish, o‘zaro tajriba almashish va texnologiyalar transferini amalga oshirish muhimligini ta’kidladi.
Tayyor sanoat mahsulotlari ko‘rgazmasidan lavhalar
Iordaniya podshohining O‘zbekistonga tashrifi
Iordaniya podshohi Abdulla II ibn al-Husayn O‘zbekiston prezidenti taklifiga binoan 25-avgust kuni ilk bor davlat tashrifi bilan O‘zbekistonga keldi. Uni Samarqand shahri aeroportida Shavkat Mirziyoyev kutib oldi. Shu kuni ular birgalikda Samarqand shahrining tarixiy obidalari, jumladan, Amir Temur maqbarasi, Mirzo Ulug‘bek, Sherdor va Tillakori madrasalaridan iborat Registon majmuasi bilan tanishdi. Samarqand xalqaro turizm markazidagi “Boqiy shahar” tarixiy-etnografik majmuasini borib ko‘rdi.
26-avgust kuni Samarqand shahridagi Kongress markazi binosi oldidagi maydonda Iordaniya podshohini tantanali kutib olish marosimi o‘tkazildi. Bugun O‘zbekiston-Iordaniya sammitining asosiy tadbirlari, shu jumladan oliy darajadagi muzokaralar bo‘lib o‘tadi. Muloqotda siyosiy, savdo-iqtisodiy va investitsiyaviy hamkorlikni rivojlantirish masalalarini ko‘rib chiqish rejalashtirilgan.
Izoh (0)