“Xalq banki” matbuot xizmati ijtimoiy tarmoqlarda tarqalayotgan “‘Xalq banki’ qolgan pulni nima qilyapti?” mazmunidagi xabarlarga raddiya berdi.
Bankning ma’lum qilishicha, bola tug‘ilganda beriladigan nafaqa pullari (suyunchi puli) belgilangan miqdordan kam berilayotgani haqidagi ma’lumotlar haqiqatga to‘g‘ri kelmaydi. Suyunchi puli prezidentining tegishli farmoniga asosan, mehnatga haq to‘lashning eng kam miqdorining 70,3 foizi miqdorida belgilanadi.
2025-yil 1-avgustdan boshlab mehnatga haq to‘lashning eng kam miqdori 1 271 000 so‘m etib belgilangach, suyunchi puli miqdori 893 513 so‘m qilib to‘lab berilmoqda. Mazkur nafaqa Ijtimoiy himoya milliy agentligi tomonidan tayinlanadi va moliyalashtiriladi.
“Xalq banki” esa ushbu mablag‘larni aholiga yetkazib beradi. Fuqarolar suyunchi pulini ilova orqali mustaqil yuklab olish imkoniyatiga ham ega. Bank nafaqa miqdorini belgilash yoki o‘zgartirish vakolatiga ega emas.
Shuningdek, ilovaning yangilanishi yoki yangilanmasligi bola tug‘ilganda beriladigan nafaqa miqdoriga hech qanday ta’sir ko‘rsatmasligi aytildi. Qayd etilishicha, farzand 1-avgustga qadar tug‘ilgan bo‘lsa suyunchi puli 811 365 so‘m miqdorda to‘lanadi, 1-avgustdan keyin tug‘ilgan bo‘lsa suyunchi puli 893 513 so‘m miqdorida beriladi.
O‘zbekistonda 2025-yil iyun oyida 32 184 ming nafar fuqaroga bir martalik nafaqa to‘lovlari to‘lab berildi. Mazkur oyda 32 184 ming nafar fuqaro uchun 37,2 mlrd so‘m bir martalik nafaqa to‘lovlari to‘lab berildi. Shundan:
- 19 702 nafar fuqaroga 15,9 mlrd so‘m — farzand tug‘ilganda beriladigan bir martalik (suyunchi) nafaqasi;
- 12 482 nafar fuqaroga 21,3 mlrd so‘m — dafn etish uchun nafaqasi to‘lab berildi.
May oyida 30 401 nafar fuqaroga bir martalik nafaqa to‘lovlari amalga oshirilgandi. Umumiy to‘lov miqdori 36,7 milliard so‘mni tashkil etgan. Bir oyda ko‘rsatkichda ortish kuzatilgan.
Jumladan may oyida:
- 17 119 nafar fuqaroga 13,9 milliard so‘m miqdorida yangi tug‘ilgan farzand uchun bir martalik suyunchi nafaqasi;
- 13 282 nafar fuqaroga esa 22,8 milliard so‘m miqdorida dafn etish nafaqasi to‘lab berilgan edi.
2025-yil iyun oyida pensiya tayinlash uchun zarur ish stajiga ega bo‘lmagan 7 146 nafar fuqaroga nafaqa, moddiy yordam va kompensatsiya to‘lovlari tayinlab berildi.
Izoh (0)