“Bojalar” guruhi solisti Jahongir Poziljonov, shuningdek, xonandalar Doston Ergashev va Asilbek Amanulloh ijrosidagi qo‘shiqlardan muallifning ruxsatisiz foydalangan didjey qonunchilikka muvofiq jarimaga tortildi.
Xabar berilishicha, “Bojalar” guruhi solisti Jahongir Poziljonov va xonandalar Doston Ergashev ijrosidagi “Uylanamiz”, shuningde,k Asilbek Amanulloh (Negmatov) ijrosidagi “Oppoq aka” nomli qo‘shiqlar fuqaro I.Ruziyev tomonidan muallifning ruxsatisiz hamda tegishli yozma shartnoma tuzmagan holda, Navoiy viloyatining Karmana tumanida joylashgan to‘y-marosimlar markazida omma e’tiboriga havola etilgani aniqlandi.
Holat yuzasidan huquqbuzarga nisbatan Ma’muriy javobgarlik to‘g‘risidagi kodeksning 177 prim 1-moddasi bilan ma’muriy huquqbuzarlik to‘g‘risidagi bayonnoma rasmiylashtirilib, tegishli sudga yuborildi.
Jinoyat ishlari bo‘yicha Karmana tuman sudining qaroriga ko‘ra, huquqbuzarga nisbatan Ma’muriy javobgarlik to‘g‘risidagi kodeksning 177 prim 1-moddasining birinchi qismi bilan jarima jazosi tayinlandi.
Ma’lumot uchun, qonunchilikka muvofiq muallif huquqbuzardan zarar qoplanishi o‘rniga bazaviy hisoblash miqdorining 20 baravaridan 1000 baravarigacha miqdorda tovon to‘lashini talab qilishga haqli hisoblanadi.
Bundan avval xonanda Feruza Karimova qo‘shiq ijrosida she’rdan ruxsatsiz foydalangani uchun muallifga 40 mln so‘mdan ziyod to‘laydigan bo‘lgandi.
Shuningdek, Rayhonning “Yaxshimasmi” qo‘shig‘ida she’rdan muallif ruxsatisiz foydalanilgani aniqlangandi. Shoir “Shamsiddin Sadoiy”ning Adliya vazirligiga qilgan murojaati asosida “Davlating borida”, “Omonat” va “Tingla do‘stim” nomli sheʼrlari xonanda Botir Qodirov tomonidan huquq egasi ruxsatisiz hamda tegishli tartibda mualliflik haqini to‘lamasdan foydalanilgani aniqlangan. Yana bir mashhur shoir xonanda Botir Qodirov ustidan Adliyaga shikoyat qilgan.
“Abdussamiy” taxallusi bilan bilan tanilgan shoir Shohrux Abduvohidovga tegishli “Qizg‘anaman”, “So‘nggi nafasgacha”, “Sog‘indim yomon” hamda “Dildora” nomli sheʼrlar xonanda Botir Qodirov tomonidan huquq egasi ruxsatisiz hamda tegishli tartibda mualliflik haqini to‘lamasdan foydalanilgan.
Kuni kecha esa Manzura va Murodjon Yo‘ldoshev “Azizim” qo‘shig‘ini muallif ruxsatisiz kuylagani maʼlum bo‘lgandi.
Izoh (0)