Isroil harbiy razvedkasi boshqarmasining sobiq generali Aharon Halivaning maxfiy audioyozuvlari Isroilning Channel 12 telekanali tomonidan internetga sizdirildi. Unda general G‘azoda halok bo‘layotgan o‘n minglab falastinliklarning o‘limini “kelajak avlodlar uchun zarur va muhim” deb aytadi. Bu haqda CNN xabar berdi.
Sobiq generalning ta’kidlashicha, Isroil tomonidan boy berilgan har bir qurbon evaziga 50 nafar falastinlik halok bo‘lishi lozim.
“7-oktyabr voqealaridagi har bir qurbon evaziga 50 nafar falastinlik halok bo‘lishi kerak. Bu qurbon bola yoki katta bo‘lishidan qat’iy nazar, ahamiyatsiz. Fakt shuki, G‘azoda allaqachon 50 ming kishi o‘lgan va bu kelajak uchun zarur”, degan Haliva.
Generalning aytishicha, falastinliklar har safar bir “nakba”ga (arabchada katta fojia) duch kelishi kerak, toki ular qilmishlarining oqibatini his qilsinlar”. Nakba — falastin tarixidagi eng qayg‘uli voqealardan biri bo‘lib, 1948-yilda Isroil davlati tuzilgan paytda 700 mingdan ortiq falastinlik o‘z uyidan quvib chiqarilgandi.
Haliva 2023-yil 7-oktyabr kuni HAMASning Isroil janubiga qilgan hujumi vaqtida razvedka boshlig‘i bo‘lgan. O‘sha hujumlarda 1200 kishi halok bo‘lgan, 250 kishi garovga olingan edi. U 2024-yil aprelida rahbarlik mas’uliyatini tan olib, iste’foga chiqqan birinchi yuqori martabali ofitserga aylangan. Audioyozuvlarda Haliva faqat armiya emas, balki Isroil siyosiy rahbariyati va xavfsizlik xizmati (Shin Bet) ham 7-oktyabr fojiasiga mas’ul ekanini ta’kidlaydi. Unga ko‘ra, rahbariyat HAMAS hujum qilmaydi, degan noto‘g‘ri fikrda bo‘lgan.
Haliva Channel 12 ga bergan izohida gaplari “yopiq forumda aytilgani”ni ta’kidlab, bu “to‘liq vaziyatni ifodalamaydi” degan. Shuningdek, u gaplaridan afsusda ekanini ham bildirgan. HAMAS Halivaning gaplarini qoralab, “bu yozuvlar falastinliklarga qarshi jinoyatlar yuqori darajadagi siyosiy va xavfsizlik qarorlari asosida amalga oshirilayotganini tasdiqlaydi”, deya bayonot bergan.
Isroil G‘azodagi urush sabab tobora ko‘proq xalqaro bosim ostida qolmoqda. Yangi Zelandiya bosh vaziri Kristofer Laksonga ko‘ra, Benyamin Netanyaxu “vaziyatni butunlay boy bergan”, G‘azo shahrini bosib olish esa “qabul qilib bo‘lmaydigan ish”. Daniya bosh vaziri Mette Frederiksen esa Netanyaxuni “o‘zi alohida muammoga aylangan shaxs” deb ta’riflamoqda.
BMT maxsus qo‘mitasi 2024-yil noyabr oyida Isroilning G‘azodagi harakatlari “genotsid belgilari bilan mos kelishini” ta’kidlagandi. Iyul oyida esa ikki isroillik huquq tashkiloti mamlakatni “genotsid sodir etayotganlikda” ayblagan. Yahudiy armiyasi esa bunday da’volarni qat’iyan rad etib, o‘z harakatlari xalqaro huquqqa mos ekanini bildirmoqda.
Izoh (0)