Xitoyda 75 yoshli Tzyan ismli pensioner sun’iy intellekt yordamida yaratilgan virtual ayolga oshiq bo‘lib qoldi. Ularning muloqoti shu darajaga yetdiki, erkak haqiqiy xotinidan ajrashib, “sun’iy intellekt sevgilisi” bilan hayotini bog‘lashga qaror qildi, deb yozmoqda World of Buzz nashri.
Tzyan ijtimoiy tarmoqlarni ko‘zdan kechirayotganda bir ayolning akkaunti uning e’tiborini tortadi. U ayolning ko‘rinishi va nutqi sun’iy tarzda yaratilganini anglamadi. Shu bois ular o‘rtasida muloqot boshlanganida erkakda hech qanday shubha tug‘ilmadi. Hatto virtual “suhbatdosh”ning lab harakati bilan ovozi bir-biriga mos kelmaganda ham, erkak bunga e’tibor qilmadi.
Oradan vaqt o‘tib, virtual ayol bilan muloqot pensionerning kundalik odatiga aylandi. Tzyan unga qattiq bog‘lanib, har kuni xabar kutib soatlab telefonga qarab o‘tiradigan bo‘ldi. Bu bog‘lanish vaqt o‘tishi bilan kuchaydi va bir kuni erkak rafiqasi bilan telefonga mukkasidan ketganligi tufayli janjallashib qoldi va jahl ustida ajrashishga qaror qildi. Uning niyati virtual sevgilisi bilan “yangi hayot” boshlash edi.
Ammo oxir-oqibat farzandlari uni bu safsata ekanligiga ishontirishga muvaffaq bo‘ldi. Ular otasiga uning “sevgilisi” aslida mavjud emasligini, u sun’iy intellekt tomonidan yaratilgan avatar ekanini tushuntirib berishdi. Shundan keyin Tzyan ajrashish fikridan qaytdi va oilasi bilan birga qoldi.
Bu kabi voqealar so‘nggi yillarda tobora ko‘payib bormoqda. Masalan, AQShda bir ayol 20 yillik turmush o‘rtog‘idan ajrashib, ChatGPT bilan “munosabat” boshlagan. Yana bir erkak esa joriy yilning may oyida, oilasi va farzandi bo‘lishiga qaramay, sun’iy intellekt neyrotarmog‘iga turmush qurish taklifini bildirgan.
Izoh (0)