Germaniya bir nechta NATO ittifoqchilari bilan birga AQSHning Ukrainaga qurol va o‘q-dori yetkazib berish bo‘yicha ilk paketlaridan birini moliyalashtirishga kelishib oldi. Paket qiymati 500 million dollarga baholanmoqda. Bu haqda Anadolu xabar berdi.
Moliyalashtirish kelishuvi haqida Germaniya tashqi ishlar vazirligi 13-avgust kuni ma’lum qilgan. Aytilishicha, bu qaror Ukrainani qo‘llab-quvvatlovchi “Koalitsiya” yetakchilarining videomuloqotida kelishib olingan. Ushbu majlisga Fransiya prezidenti Emmanuel Makron, Buyuk Britaniya bosh vaziri Kir Starmer va Germaniya kansleri Fridrix Mers raislik qilgan.
“AQSHning Ukrainaga qurol va o‘q-dori yetkazib berishni davom ettirishga tayyorligini olqishlaymiz. Ushbu tashabbusda ishtirok etish bilan Ukrainani kuchliroq va barqaror qo‘llab-quvvatlashimizni yana bir bor isbotlayapmiz”, deyiladi TIV bayonotida.
Ma’lum qilinishicha, yangi yaratilgan PURL (Prioritized Ukraine Requirements List —Ukrainaning ustuvor talablari ro‘yxati) mexanizmi orqali NATO yetkazib berish jarayonini muvofiqlashtiradi va Ukrainaning eng dolzarb harbiy ehtiyojlariga mos kelishi ta’minlanadi. Moliyalashtirish Yevropa hamkorlari va Kanada orqali amalga oshiriladi.
Bayonotda aytilishicha, paketga Yevropada ishlab chiqarilmaydigan yoki AQSH Yevropa va Kanadadan tezroq yetkazishi mumkin bo‘lgan harbiy mahsulotlar kiradi. Bunda, xususan, Rossiya havo hujumlarini to‘xtatish uchun zarur bo‘lgan muhim havo mudofaasi tizimlari ham qamrab olingan.
AQSH prezidenti Donald Tramp iyul boshida Ukrainaga qurol yetkazib berishni to‘xtatishini aytgandi. Lekin u keyinchalik bu qarorini o‘zgartirib, Yevropa davlatlari moliyalashtirish sharti bilan qurol yordamini davom ettirishga rozi bo‘lgandi.
Rasmiy ma’lumotlarga ko‘ra, Germaniya Yevropada Ukrainaga eng yirik harbiy yordam ko‘rsatuvchi davlat bo‘lib, mamlakat 2022-yildan beri umumiy qiymati 40 milliard yevro (46,8 milliard dollar)lik yordam bergan. Bu yordam “Leopard 2” va “Gepard zenith” tanklari, “Marder” jangovar mashinalari, “Patriot” hamda “IRIS-T” havo mudofaasi tizimlarini o‘z ichiga oladi.
Izoh (0)