Saudiya Arabistonining eng kuchli klublaridan biri — “Al-Hilol” Angliyaning “Nyukasl” klubi hujumchisi Aleksandr Isakka moliyaviy tomonlama katta shartnoma taklif qildi. Bu haqda The Guardian nashri xabar bermoqda.
Manbaga ko‘ra, Saudiya klubi shved futbolchisiga haftasiga 600 ming funt sterling miqdorida maosh taklif qilgan, ushbu summadan soliq olinmasligi alohida ta’kidlangan. Bundan tashqari, riyodliklar tomonidan Isakka turli bonuslar va qo‘shimcha imtiyozlar ham va’da qilingan. Biroq hozircha futbolchi bu borada bir qarorga kela olmayapti.
Isakka Angliya Premyer Ligasining yana bir grand klubi — “Liverpul” ham jiddiy qiziqish bildirmoqda. Biroq mersisaydliklar futbolchiga “Al-Hilol”niki kabi katta shartnomani taklif qila olmaydi. Shuningdek, “Nyukasl” tomonidan futbolchi uchun so‘ralayotgan katta miqdordagi tovon puli — 120 million funt sterling (taxminan 140 million yevro) ham “Liverpul” uchun jiddiy to‘siq bo‘lib turibdi.
Ma’lumot uchun, Aleksandr Isak 2022-yil yozida Ispaniyaning “Real Sosyedad” klubidan “Nyukasl”ga o‘tgan edi. Uning amaldagi shartnomasi 2028-yil yozigacha mo‘ljallangan. Transfermarkt portali Isakning transfer qiymatini 120 million yevro atrofida baholamoqda.
Izoh (0)